“18 yaşından sonra şəhid övladının şəhid ailəsi statusu ləğv edilir”

“Gəncədən olan 30-a yaxın şəhid övladı bizə müraciət edərək onların imtiyazlarına düzəliş edilməsini təklif edib”. 
Manevr.az qafqazinfo-ya istinadən xəbər verir ki, bunu Milli Məclisin deputatı Müşfiq Cəfərov bildirib. O qeyd edib ki, qanunvericiliyə əsasən şəhid övladları 18 yaşına kimi, təhsil vəziyyəti ilə bağlı isə 23 yaşına qədər dövlətin himayəsində olurlar: “18 yaşından sonra şəhid övladının şəhid ailəsi statusu ləğv edilir. Azərbaycan mentalitetində valideynlər bir qayda olaraq ömürlərinin sonuna qədər öz övladlarını həm maddi, həm də mənəvi olaraq himayə edirlər. Düşünürəm ki, şəhid övladlarının himayədarı Azərbaycan dövlətidir”.
Deputat bildirib ki, şəhidin varisi olan həyat yoldaşı və ya anası vəfat etdikdə onun ev növbəliliyi ləğv olunur: “Bu hüquq şəhid qardaşı və ya bacısına keçmir. Bu məsələnin öz həllini tapması dövlətimizin şəhid ailələrinə olan diqqət və qayğısını daha da möhkəmləndirib təkmilləşdirəcək”.