“Hökumətin bu ilin birinci rübündə bahalaşma səviyyəsinə dair açıqladığı məlumat saxtadır. Onun Azərbaycan reallığı ilə heç bir əlaqəsi yoxdur”.
Manevr.az xəbər verir ki, bu sözləri yenisabah.az-a iqtisadçı Nemət Əliyev deyib.
O, neft qiymətinin artımı əsnasında 2022-ci ilin ikinci rübündə pensiya və əmək haqlarının artırılacağı ehtimalı danışıb:
“Ölkə miqyasında 12,2 faiz bahalaşma elan edilib, amma apardığımız hesablamalar göstərir ki, həmin göstərici 30-32 faiz arasında dəyişir.
Bəziləri düşünür ki, neft bahalaşıbsa, bu, təqaüd, maaş və müavinətlərin artımına müsbət təsir edəcək. Halbuki neftin qiyməti ötən ildən artıb. Məsələn, 2021-ci ilboyu Azərbaycan ixrac mallarının bahalaşmasından 13 milyard manat qazanıb. Faizlə ifadə etdikdə ixrac malları 56 faiz bahalaşıb. Bu, əmək haqqı və pensiyalarda əks olunub, amma həmin artımlar yetərsizdir.
Ötən ilin sonunda muzdla çalışanların əmək haqlarına 3,4 faiz artım hesablanıb, amma rəsmi bahalaşma səviyyəsi 6,4 faizdir. Bu iki göstəricinin müqayisəsi hər şeyi deyir. Baxmayaraq ki, neft gəlirləri həddən ziyadə artıb, ixrac malları bahalaşıb, amma son nəticədə, ilin sonunda əhalinin alıcılıq qabiliyyəti azalıb, ölkədə həyat səviyyəsi göstəricisi pisləşib”.
Nemət Əliyevin sözlərinə görə, əmək haqlarının artım tempi qiymətlərin artım tempindən geridə qalır:
“Nikbin ovqat aşılayan iqtisadçıları qınamaq lazım deyil. Çünki həmin iqtisadçılar məntiqi-nəzəri təfəkkürdən çıxış edirlər. Normal düşüncə bundan ibarətdir ki, bir halda ki, dövlətin gəlirləri artır, deməli, əməkhaqqı, pensiya, müavinətlər də artacaq. Çatışmayan budur ki, əvvəlcə qiymətlərə böyük təkan verib qaldırır, bununla da alıcılıq qabiliyyətini kəskin şəkildə pisləşdirir, ondan sonra əmək haqlarına artım edirlər”.
İqtisadçı qeyd edib ki, hər kəs son aylarda baş verən bahalaşmanın fərqindədir:
“Açığı, fikrimi bədbin notlarla bitirmək istəməzdim, lakin təəssüf ki, Azərbaycan reallığı belədir. Mənə elə gəlir ki, marketlərə girəndə hər kəs bunun fərqinə varır. Məsələn, 2 il bundan əvvəl, bu vaxtlar soğanın qiyməti 60-70 qəpik idi, amma indi hara getsən, 1 manatdan ucuz soğana rast gəlməzsən. Kartofun qiyməti 60-70 qəpik idi, indi 1 manat 50 qəpik. Tərəvəzlərin qiymətində orta hesabla 58 faiz bahalaşma müşahidə olunur. Buğda ununun qiymətində 48 faiz artım yaşanır. Bahalaşma o qədər yüksəkdir ki, pensiyaların, müavinətlərin, əmək haqlarının artması istiqamətində hökumətin atdığı bütün addımların effektini heçə enir.
Əlbəttə, belə bir şəraitdə nikbin gözlənti əmək haqlarının və pensiyaların artımı olur. Bunun üçün yetərincə əsaslar var. Amma təəssüf ki, hökumət bunu etmək istəmir, yaxud da bacarmır. Nəticə bu dərəcədə acınacaqlıdır. Biz artımın olmasını arzulayırıq, amma arzulamaq çox azdır. Gərək bunu hökumət də arzulasın və həyata keçirsin”.

Manevr.az