.png)
Manevr.az xəbər verir ki, mövzu ilə bağlı konkret.az-a danışan nəqliyyat eksperti Elməddin Muradlı avtomobillərin qiymətinin bir qədər də arta biləcəyini deyib: “Bir çox ölkələrdən gətirilən avtomobillərin qiymətində artım müşahidə olunur. Ənənəvi məşhur modellərin qiyməti artdığına görə, alıcılar Çin avtomobillərinə daha çox maraq göstərir. Rusiyanın Avropa brendlərinə oxşar bəzi modelləri var ki, onlara da maraq artıb. Lakin Rusiya-Ukrayna müharibəsi bu sahəyə də öz təsirini göstərdi. Rusiyada avtomobil bazarında qiymətlər təxminən 30 faizdən çox bahalaşıb. Bu, Azərbaycana hələlik çox ciddi təsir göstərməyib. Çünki ilin sonlarına yaxın Azərbaycana kütləvi avtomobil gətirildi və hələlik həmin maşınlar satışdadır. Ola bilsin ki, növbəti mərhələdə qiymətlər müəyyən qədər artsın”.
Ekspert qeyd edib ki, Azərbaycanda avtomobil bazarı alverçilərin əlində dövr edir: “Alverçilər hansısa ölkədə bizə aidiyyəti olmayan səbəbləri əsas gətirib qiymətləri artırır. Onlar mafiya kimi bazarı öz əllərində cəmləşdirib öz bildiklərini edir. Bəzən özləri süni qiymət artımına yol verir. Yanvar ayından etibarən maşınların qiymətində artım müşahidə olunur. Bəzi modellərin qiymətində iki min manatadək artım var. Bu, xüsusilə dizellə işləyən avtomobillərə aiddir. Çünki hökumət yanvarın 1-dən etibarın ölkəyə gətirilən dizel mühərrikli avtomobillərə görə, rüsumları artırıb. Ekoloji təhülkəsizliyin təmin olunması üçün dizel avtomobillərin ölkəyə gətirilməsinə müəyyən sanksiyalar tətbiq edilir. Bir çox ölkələr həmin maşınlardan artıq imtina edib. Lakin rüsum fərqi artıdqca alverçilər bunu bəhanə edib qiymətləri 3 qat bahalaşdırır. Bu isə özbaşınalıq deməkdir”.
Ekspert daha çox tələb olan avtomobil markalarının da adlarını açıqlayıb: “Alıcıların əksəriyyəti daha çox “Mercedes”, “Toyota”, “Honda” kimi avtomobil markalarına üstünlük verir. Dünyanın ən təhlükəsiz avtomobili kimi məşhurlaşan “Volvo”ya da maraq çox böyükdür. Çünki onun təhükəsizlik elementləri çoxdur və qəza zamanı ölüm riski aşağıdır. “Ford”un elə modelləri var ki, qiymətinə görə dəb halını alır. Həmçinin, “Mercedes” azərbaycanlıların ən sevimli markasıdır. Müəyyən qadağalardan sonra “Mercedes”in köhnə modelləri yeniləri ilə əvəz olunub. Yapon brendi olaraq “Toyota”ya hər zaman böyük maraq olub. “Toyota” avtomobilləri yolsuzluq şəraitinə dözümlüdür. Onun hibrid modellərinə Azərbaycanda da maraq çoxdur. Lakin təəssüf ki, ölkəmizə daha çox buraxılış ili köhnə olan hibridlər gətirilir. Güzəşt mexanizmi təkmilləşərsə gələcəkdə ölkəmizə yeni model hibridlərin gətirilməsinin şahidi ola bilərik”.
.jpg)
