“Ermənilərlə gec-tez qonşuluq münasibətləri yaranacaq”.
Manevr.az xəbər verir ki, bu sözləri yenisabah.az-a açıqlamasında professor Əli Abbasov deyib.
Xatırladaq ki, ötən gün politoloq Zərdüşt Əlizadə Ermənistanla qonşuluq münasibətlərini bərpa etməyin vacibliyindən danışıb. Deyib ki, erməni dostlarının tezliklə qatara minib Bakıya gəlməsini arzulayır.
Onun sözlərinə görə, Azərbaycanda 3 nəfər tanınmış şəxs - Arzu Abdullayeva, Rəhman Bədəlov və Əli Abbasovun vaxtı ilə ermənilərlə sıx dostluq münasibətləri olub.
Əli Abbasov bizimlə söhbət zamanı həmkarının fikrilərini təsdiqləyib. Onun sözlərinə görə, dövlət tərəfindən icazə verilsə, gediş-gəliş olacaq:
“İcazə verilsə, ikitərəfli əlaqələr qurulacaq, ünsiyyət olacaq. Təbii ki, belə də olmalıdır. Hələlik icazə yoxdur. Qonşuluq münasibətləri gec-tez olacaq. Lakin ikitərəfli olmalıdır. 2016-cı ildən sonra əlaqələrimiz demək olar ki, yoxdur. Amma sonradan bərpa olundu”.
Professor Rəhman Bədəlov isə vəziyyətin faciəli olduğunu deyib:
“Ermənistan-Azərbaycan münasibətlərinə mənim rəyim o qədər fərqlidir ki... Elə müharibəyə də. Bu barədə çox danışmasam yaxşıdır. Mən nə hə, nə də yox deyirəm. Mən hər şeydən yazıram. Amma məcradan heç vaxt çıxmıram. Ümumiyyətlə, vəziyyət mənə faciəli gəlir. Uzun uzadı danışılası deyil”.