ABŞ-ın 2023-cü ilin büdcəsi Ermənistanı məyus edəcək. Bayden Administrasiyasının ABŞ Konqresini Ağ Evin 2023-cü maliyyə ili üçün büdcə təklifində Ermənistana 24 milyon ABŞ dolları ayırmağa çağırması bunu deməyə əsas verir.
Bu məbləğ 2022-ci maliyyə ili üçün bir neçə həftə əvvəl Konqres tərəfindən ayrılan və Prezident tərəfindən təsdiq edilən məbləğdən 21 milyon dollar azdır. Bayden Administrasiyasının bu addımı ermənilərin ABŞ-dakı əsas lobbi təşkilatı olan Amerika erməni milli komitəsinin (ANCA) narazılığına səbəb olub. Erməni diasporu/lobbisi istəyinə nail ola bilmir.
Erməni diasporu/lobbisini narazı salan məqamlardan biri də Prezident Baydenin Konqresdən 2023-cü maliyyə ili üçün Azərbaycana 9,7 milyon dollara yaxın yardım ayrılmasını istəməsidir. Bu yardıma Azərbaycanın ABŞ Müdafiə Nazirliyindən 333-cü bölmə (potensialın gücləndirilməsi) çərçivəsində aldığı əlavə vəsaitlər daxil deyil. Hökumət Hesabatlılığı İdarəsinin (GAO) mart ayında açıqladığı hesabata əsasən, Azərbaycan 333-cü Bölmə çərçivəsində ABŞ-dan 164 milyon dollardan çox yardım alıb.
Ağ Evin 2023-cü il üçün büdcə təklifində əsas diqqətçəkən məqam Qarabağla bağlıdır. 2022-ci il büdcəsində minaların təmizlənməsi məqsədilə Qarabağa 2 milyon dollar ayıran Vaşinqton 2023-cü ilin büdcə təklifinə bu məsələni ümumiyyətlə daxil etməyib.
Belə bir addım 44 günlük müharibədən sonra regionda yaranmış reallığın Bayden Administrasiyası tərəfindən qəbul edilməsi deməkdir. Yeni reallıqda nə “Dağlıq Qarabağ” adlı ərazi vahidi, nə də qondarma “DQR”mövcuddur. ABŞ-ın indiyə qədər bu qondarma rejimə maliyyə yardımı ayırması beynəlxalq hüquqa zidd adımdır. Ayrılan milyonlarla dolların hamısı isə kriminal-terrorçu rejim tərəfindən mənimslənilirdi və böyük ehtimalla bu mənimsəmədə ABŞ-ın maliyyə yardımı ayırmasına nail olan erməni diasporu/lobissinin də öz payı var idi. Artıq nə “Dağlıq Qarabağ”, nə də qondarma “dqr” olmadığı üçün ABŞ-ın Qarabağa yardım ayırmasına heç bir bəhanə yoxdur.
