Prezident İlham Əliyev İranın yol və şəhərsalma naziri Rüstəm Qasiminin başçılıq etdiyi nümayəndə heyətini qəbul edib. Bu görüşün böyük əhəmiyyət kəsb etməsi heç kimə sirr deyil. İkitərəfli əlaqələrin inkişafı və münasibətlərin dərinləşməsi baxımından görüşün keçirilməsinin önəmi isə sözlə izah edilməyəcək qədər böyükdür.
Manevr.az xəbər verir ki, mövzu ilə bağlı konkret.az-a açıqlama verən Beynəlxalq münasibətlər üzrə ekspert Əziz Əlibəylinin sözlərinə görə,  Azərbaycan diplomatiya tarixinin qələbələrindən birni əldə etmiş oldu: “Çünki Azərbaycanın iki ərazisi (Şərqi Zəngəzur rayonu və Naxçıvan) ilə beynəlxalq yolun çəkilməsi (bir hissəsi İranın ərazisinə düşür) haqda razılıq əldə olundu. Bu möhtəşəm qələbə Azərbaycanın Vətən müharibəsində əldə etdiyi tarixi zəfərin davamı kimi xarakterizə oluna bilər. Bu, eyni zamanda Şərqi Zəngəzur rayonu ilə Naxçıvan arasındakı (həm də Ermənistan ərazisindən keçəcək) Zəngəzur dəhlizi məsələsini də faktiki gündəmə gətirir”.

Əziz Əlibəyli əlavə edib ki, indiki halda Ermənistan həm öhdəliklərini yerinə yetirməli olacaq, həm regionda tək qalacaq, həm də İranın bu layihəyə qoşulması ilə rəsmi İrəvan heç bir halda 10 noyabr razılaşmasının nəticələrindən imtina edə bilməyəcək: “Yəni bu müqavilə ilə Ermənistan bölgədə tamamilə təklənmiş oldu. İran və Azərbaycan arasında isə demək olar ki, heç bir sahədə toqquşma üçün səbəb qalmadı. Qlobal sistemlərin və yeni dünya nizamının toqquşduğu bir məqamda bu cür müqavilənin imzalanması olduqca böyük əhəmiyyət kəsb edir. Biz daha öncə Türkiyə ilə strateji Şuşa Bəyannaməsi, Rusiya ilə Moskva Bəyannaməsi imzaladıq. Bunu da Zəngəzur Bəyannaməsi adlandıra bilərik. Ölkə başçısı bu dərəcədə möhtəşəm bir işin memarı oldu”.