Xəbər verdiyimiz kimi, bu gün Belarus qoşunları Çerniqov vilayətinə daxil olub. “Şimal” müdafiə qüvvələrinin regional idarəsinin nümayəndəsi Vitali Kirillov Belarusun müharibəyə qoşulduğunu və qoşunların Çerniqov vilayətinə daxil olduğunu təsdiqləyib. Maraqlıdır, Belarusdan sonra Qazaxıstan da bu müharibəyə qoşula bilərmi? Belarusun Ukraynaya qoşun yeritməsi artıq Üçüncü Dünya müharibəsinin başlaması deməkdirmi?
Manevr.az-ın məlumatına götə, mövzu ilə bağlı konkret.az-ın suallarını sabiq xarici işlər naziri, politoloq Tofiq Zülfüqarov cavablandırıb. Politoloq bildirib ki, KTMT-nin bu və ya digər şəkildə müharibəyə qoşulduğuna dair qərar qəbul etdiyini düşünmək olmaz: “Hesab edirəm ki, Belarusla Rusiya arasında daha dərin mütttəfiqlik əlaqələri var. Onların siyasi müttəfiqlik layihəsi mövcuddur. Bu layihədə əksini tapan məqsədlər ondan ibarətdir ki, adıçəkilən ölkələr müəyyən tarixi mərhələdə birləşə bilər. Lakin Qazaxıstan və ya digər KTMT ölkələrinin bu müharibəyə qoşulacağını iddia etmək düzgün olmaz. Bunun üçün əsas yoxdur. Lakin vəziyyət hər an hər şeyin ola biləcəyini diqtə edir”.
T.Zülfüqarov bildirib ki, Qazaxıstanda vəziyyət hələ də sabitləşməyib: “Qazaxıstanda təzə hakimiyyətin güclənməsi prosesi gedir. Bu mənada qazaxların vəziyyəti daha mürəkkəbdir. Ona görə də Qazaxıstanın belə təhlükəli layihəyə qoşulacağı inandırıcı deyil. Hələlik dünya müharibəsi haqda danışmaq üçün çox tezdir”.