Zelenskidən Rusiya ilə bağlı mühüm sərəncam

Ukrayna öz milli məhdudlaşdırıcı tədbirlərini Avropa Birliyinin Rusiyaya qarşı qəbul etdiyi 15-ci, 16-cı və 17-ci sanksiya paketləri ilə uyğunlaşdırıb.
Manevr.az axar.az-a istinadən bildirir ki, bununla bağlı Ukrayna Prezidenti Vladimir Zelenski sərəncam imzalayıb.
Prezidentin sanksiya siyasəti üzrə müşaviri və səlahiyyətli nümayəndəsi Vladislav Vlasükün jurnalistlərə verdiyi açıqlamaya görə, 15-ci sanksiya paketi Rusiya, Belarus, Çin və digər ölkələrdən olan şəxsləri əhatə edir. Bu siyahıya "Oxmatdet" xəstəxanasına zərbə endirməkdə iştirak etmiş rusiyalı pilot Aleksandr Azarenkov və döyüş robotları istehsal edən "Gumiç" MMC daxildir.
Eyni zamanda, 16-cı sanksiya paketi Rusiyadan, Çindən, Türkiyədən və digər ölkələrdən olan şəxsləri əhatə edir. Siyahıya işğal olunmuş ərazilərdə hərbi-vətənpərvərlik tərbiyəsi ilə məşğul olan "VOİN" mərkəzi və Rusiya neftini "kölgə donanması" vasitəsilə daşıyan "Cənub Donanması" MMC daxildir.
Avropa Birliyinin 17-ci sanksiya paketi isə təcavüzkar ölkəyə qarşı yönəlib və Rusiya, Çin, Türkiyə və digər ölkələrdən olan şirkətləri əhatə edir. Bu sanksiyalara qızıl hasilatı ilə məşğul olan "Petropavlovsk" şirkəti və Rusiyaya dron istehsalında iştirak edən Çin şirkəti "Skywalker Technology Co. Ltd" daxil edilib.