“İyulun 14-də Xankəndidə erməni separatçılarının tör-töküntüləri tərəfindən Azərbaycana qarşı başlanan aksiya xaricdən idarə olunur. Suverenliyimizə, konstitusyon quruluşumuza qarşı yönəlmiş nümayiş faktiki olaraq ora nəzarət edən rus sülhməramlı kontingenti tərəfindən alınmalı idi. Təəssüf ki, biz bunun əksini görürük. Rus hərbçilərinin gözü qarşısında Qarabağa silah-sursat daşınır, qanunsuz hərbi birləşmələr orada mühaəndis-istehkam işləri aparırlar, oyuncaq hökumətin nümayəndələri Azərbaycan dövlətini təhdid edirlər, amma heç bir tədbir görülmür. Bütün bunlar onu göstərir ki, Rusiyada müəyyən dairələr Qarabağda münaqişənin qalmasında maraqlıdırlar”.
Manevr.az xəbər verir ki, bunu teleqraf.com-a açıqlamasında politoloq Ramiz Alıyev bildirib.

Onun sözlərinə görə, 22 fevral 2022-ci ildə Rusiya və Azərbaycan arasında müttəfiqlik bəyannaməsi imzalanıb: “Rus sülhməramlıları həmin bəyanata imza atmış Rusiya Prezidenti Vladimir Putinin imzasına hörmət qoymalıdırlar. İyulun 15-də Azərbaycan və Ermənistan liderlərinin Brüsseldə görüşdükləri gün Rusiya XİN Azərbaycanla bağlı qərəzli, ultimativ tonda olan mövqe sərgilədi. Guya Qarabağdakı ermənilər blokadadırlar və Laçın dəhlizi təcili şəkildə açılmalıdır və s. Azərbaycan dövləti çox doğru olaraq, Qarabağdakı ermənilərə alternativ təchizat yolunu təklif etdi. Xankənd-Ağdam yolunu təklifi Brüsseldə də dəstəkləndi. Təəssüf ki, Qərbin vasitəçiliyi ilə keçirilən görüşlərdə əldə olunan razılaşmalar Kreml tərəfindən top-tüfənglə qarşılanır. Azərbaycan-Ermənistan münasibətlərinin tənzimlənməsi üzrə mövcud iki dialoq platforması – Qərb və Rusiyanın təşkilatçılığı ilə aparılan danışıqlarda əldə olunan nəticələr müəyyən dairələri qane eləmir. Həmin dairələr ki, hətta Qarabağda separatçı rejimin tör-töküntülərini qızışdırmaqdan belə çəkinmirlər. Ermənistanla Azərbaycan arasında sülh danışıqlarının uzanması məhz Rusiya və Qərbin nüfuz savaşları üzündən baş verir. Rusiya çalışır ki, Qarabağdakı gərgin durum gələcək nəsillərə qədər davam etsin. Qərb isə Qarabağı Azərbaycan ərazisi tanısa da belə oradakı erməni əhaliyə hansısa statusun verilməsi məsələsini qabardır. Hesab edirəm ki, Qarabağdakı ermənilərə müstəqillik statusunun verilməsi yolverilməzdir və bu, gələcəyimiz üçün ciddi təhlükələr yaradır. Biz gələcək nəsillər üçün başağrısı olacaq bu məsələyə razılıq verə bilmərik. Qarabağ ermənilərinə muxtariyyət statusunun verilməsi, dövlətçilik yolumuzun altına qoyulmuş mina olardı”.
Politoloq bildirdi ki, Rusiya 10 noyabr üçtərəfli bəyanatında üzərinə götürdüyü öhdəliklərin bəzilərini hələ də yerinə yetirməməklə ədalətli tərəf imicini itirib: “Azərbaycan ərazisində qondarma rejimin “bayrağı” hələ də dalğalanırsa, bu ilk növbədə rus sülhməramlılarının vəzifələrinin öhdəsindən gəlmədiyini göstərir. Hesab edirəm ki, Qarabağda separatizmin qızışdırılmasında əsas məqsədlərdən biri 2025-ci ildə Rusiya sülhməramlılarının Azərbaycan ərazisindən çıxmasının qarşısını almaqdır. Türkiyə Prezidenti Cənab Ərdoğan NATO sammitində jurnalistlərin qarşısında çıxış edərək rus sülhməramlılarının 2025-ci ildə Qarabağı tərk edəcəyini bildirdi. Deməli, həm Azərbaycan, həm qardaş Türkiyə, həm də NATO və Qərb dövlətləri rus hərbçilərinin Qarabağdan çıxmasının tərəfdarıdırlar. Rusiya prezidenti Vladimir Putin Qarabağın Azərbaycanın tərkib hissəsi olduğunu deyirsə, Rusiyadakı bəzi dairələrin buna qarşı çıxması, Qarabağdakı separatçılara dəstək verilməsi heç cür başa düşülən deyil”.
R.Alıyev bildirib ki, Azərbaycan 10 noyabr razılaşmasına sadiqdir: “Amma bu o demək deyil ki, bizim səbrimiz tükənməzdir. Əgər Qarabağdakı separatçı rejimin dövlətçiliyimiz üçün təhlükəli davranışları davam edərsə və rus sülhməramlıları bunun qarşısını almazsa, o zaman güc strukturlarımız hərəkətə keçib təxribatçıları susdurmaq məcburiyyətinə qalacaq. Biz hələlik təkliflərlə çıxış edirik. Qarşıdakı zamanda təkliflər tələblərlə əvəz olunacaq və tələbləri yerinə yetirilməsə, konkret addımlar atmalı olacağıq”.

Manevr.az