Azərbaycan Ordusunun Laçın rayonu Minkənd kəndindəki mövqelərinin atəşə tutulması Ermənistanın bu günlərdə Gorus-Laçın yolu istiqamətində həyata keçirilən delimitasiya işlərindən narazı qaldığını göstərir.
Manevr.az xəbər verir ki, politoloq Məhəmməd Əsədullazadə cebhe.info-ya açıqlamasında belə deyib.

Qeyd edək ki, aprelin 7-si saat 13:20-dən 13:45-dək Ermənistan silahlı qüvvələrinin bölmələri Qarakilsə rayonunun Saybalı yaşayış məntəqəsi istiqamətində yerləşən mövqelərdən Azərbaycan Ordusunun Laçın rayonunun Minkənd yaşayış məntəqəsi istiqamətində yerləşən mövqelərini atıcı silahlardan atəşə tutub.
Halbuki Ermənistanın Baş naziri Nikol Paşinyan aprelin 6-da Laçın dəhlizi istiqamətində 12 kilometrlik sərhəd xəttinin 7 kilometrinin Azərbaycanla razılaşdırıldığını, 5 kilometrlik hissədə isə kartoqrafların iştirakı ilə işlərin davam etdirldiyini bildirmişdi.
Hətta Paşinyan hökumətin iclasında bu məsələyə "Sərhəddəvəziyyət xeyli yaxşılaşıb", - deyə münasibət bildirmişdi. Ancaq sərhəddə vəziyyət yenidən gərginləşib.
Məhəmməd Əsədullazadə hesab edir ki, Ermənistan postları geri çəkmək üçün Azərbaycana təzyiq etmək istəyir. Lakin bu baş verənlər Ermənistanın ziyanınadır:
"Ordu daxilində də Paşinyanın əleyhinə olan müəyyən qüvvələr var. Onlar Baş nazirə müxalif mövqedən çıxış edirlər. Bu proseslər fonunda Ermənistan rəhbərliyinin atdığı addımlar delimitasiya və demarkasiya işlərini sabotaj etməyə çalışır.
Düşünürəm ki, Azərbaycan tərəfi bununla bağlı lazımi addımlar atacaq. Ermənistanın sərhədlərin müəyyənləşməsi prosesini pozmaması və təxribatlara yol verməməsi üçün Azərbaycan qarşı tərəfə təzyiq göstərməlidir".