İranın bu addımı birmənalı qarşılanmayıb və müzakirələrə rəvac verib.Bəs görəsən, İran bu təlimlərlə kimə güc göstərir? Təlimlərdən narahat olmağa əsas varmı?
Manevr.az-ın xəbərinə görə, mövzu ilə bağlı Yenisabah.az-a danışan hərbi ekspert, ehtiyatda olan polkovnik-leytnant Elxan Şıxəliyev bildirib ki, İran bu təlimlərlə şərti olaraq Azərbaycan və Ermənistanı hədəf göstərir:

“Təbii ki, qonşu dövlətlərdə keçirilən hər hansı təlim bölgəyə də təsirsiz ötüşmür. Təlimlərdə mütləq surətdə bir hədəf göstərilir. Qarşı tərəf istənilən təlimdə bunu göstərir. Şərti olaraq hansısa ölkənin adını çəkib onu hədəf göstərməsələr də, şərti şəkildə bu edilir. İranın təlimlərində çaylardan keçmə, körpülərin atılması o deməkdir ki, onlar Araz çayının üzərindəki əməliyyatları nəzərdə tuturlar. Onlar təlimlərdə sərhəd olduqları Azərbaycan və Ermənistanı nəzərdə tutublar, çünki Araz çayı 3 ölkənin ərazisi yaxınlığından keçir. Demək ki, İran bu təlimlərlə bizə mesaj vermək istəyir. Mesaj ondan ibarətdir ki, İranın Zəngəzur kalidorunun açılmasında narazılığı var. Xüsusən də Naxçıvanla əlaqəmiz İrandan keçdiyi üçün İran bundan iqtisadi fayda götürür. Əgər Zəngəzur kalidoru açılarsa, bu fayda Ermənistan tərəfə keçə bilər, yaxud birbaşa Azərbaycan və Türkiyəyə olacaq. İran bundan narazıdır. Bunu siyasilər vasitəsilə də bildirir. Demək ki, İran bu təlimlərlə Azərbaycanı nəzərdə tutur və aqressiyası Zərgəzur kalidoruna görədir. Onlar düşünürlər ki, əgər Azərbaycan bunu güc vasitəsilə etməyə qalxsa, biz də bunu edə bilərik və sətiraltı mesaj verirlər”.
E.Şıxəliyev İranın bu addımını blef kimi qiymətləndirib:
“Məsələnin ikinci tərəfi isə Avropanın Ermənistana göndərdiyi 40-50 nəfərlik texniki heyətdir ki, bu da İranda qıcıq yaradır. Çünki İran bilir ki, o heyətlərin məqsədi təkcə Azərbaycan-Ermənistan sərhədi deyil, onların bir funksiyası da kəşfiyyat məlumatlarının toplanması olacaq. İndiki proseslərin fonunda İran planlar qurur. Bu təlimlərin məqsədi də budur. İran mesaj verir ki, bu bölgədə mən də oyunçuyam, mənim də siyasi baxışlarımı nəzərə alın. Əgər təmas xəttində bizimlə Ermənistan arasında münaqişə yaranarsa, İran Ermənistana müttəfiq olacağı mesajını verir və deyir ki, məni də güc olaraq nəzərə alın. Amma İran reallıqda bunu edə bilərmi? Düşünürəm ki, etməz. Çünki etsəydi, 44 günlük müharibədə edərdi. Həmin müharibədə biz Xudafərinə çatanda oranın iranlı qoruyucuları ilə bizim əsgərlərimiz arasında hər hansı çatışma yaşanmadı, məsələ sülh yolu ilə həll olundu və əsgərlərimiz o yolla keçdilər. Onlar 44 günlük müharibədə bunu etmədilərsə, demək ki, indi etdikləri güc göstərisi və blefdir. Çünki İran bilir ki, İsrail İranın hər hansı münaqişəyə aktiv şəkildə qoşulmasını istəyir. İran bunun fərqindədir, bu təlimdən o tərəfə keçiriləcək məsələ deyil”.

Manevr.az