İranın Rusiyaya verdiyi kamikadze dronlar və pilotsuz uçuş aparatları Rusiyanın Ukraynada ciddi hərbi üstünlük əldə etməsinə gətirib çıxarmayacaq. Buna baxmayaraq Ukrayna üçün itkilər yaşadacaq.

Manevr.az xəbər verir ki, bunu publika.az-a açıqlamasında politoloq Məhəmməd Əsədullazadə deyib.
O qeyd edib ki, İranın Rusiyanı dəstəkləməsi beynəlxalq birliyə qarşı çıxmaqdır: "Ukrayna bu məsələni beynəlxalq birliyin diqqətinə çatdırdıqca başda ABŞ olmaqla kollektiv Qərb Tehrana qarşı sanksiyaları genişləndirəcək, İranla yeni nüvə sazişi bağlanmayacaq. Həmçinin, İran daxilində etirazlara dəstək verəcəklər".
Politoloq bildirib ki, İran Rusiyaya hərbi yardımı davam etdirəcəksə, ABŞ-ın razılığı ilə İsrail tərəfindən bu ölkənin nüvə obyektlərinə zərbələr endirilə bilər: "Tehran faktiki olaraq Qərbə qarşı Rusiya ilə eyni cəbhədə yer alıb. Bu, İran üçün ciddi fəsadlara yol açacaq. Həm Suriyada, həm də İraqda İranın hərbi bazalarına hücumlar təşkil edilə bilər. Göründüyü kimi Qərbə qarşı Yaxın Şərqdə silahlı mübarizə aparan İran artıq Şərqi Avropada da bu kimi fəaliyyətlərdə yer almaqdadır. İran Cənubi Qafqazda da işğalçı Ermənistanı dəstəkləyir. Azərbaycan əleyhinə İrəvanla sanki koordinasiya olunmuş şəkildə fəaliyyət göstərir. Perspektivdə İranın Ermənistana da kamikadze dronlar və pilotsuz uçuş aparatları verməsi istisna olunmur".
Qeyd edək ki, İranın Rusiyaya pilotsuz uçuş aparatları satması və bu PUA-ların Ukraynadakı müharibədə istifadə olunması səbəbindən Kiyevlə Tehran arasındakı münasibətlərdə gərginlik yaranıb.