Rusiya Federasiyası sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri avqustun 3-ü səhər saatlarında Laçın rayonu istiqamətində yerləşən Azərbaycan Ordusunun bölmələrinin mövqelərini intensiv atəşə tutub. Bu barədə Müdafiə Nazirliyindən məlumat verilib.
Nəticədə müddətli həqiqi hərbi xidmət hərbi qulluqçusu əsgər Kazımov Anar Rüstəm oğlu aldığı güllə yarasından şəhid olub. Müdafiə Nazirliyi bölmələrimiz tərəfindən müvafiq tədbirlər görüldüyünü açıqlayıb. 
Qeyd edək ki, artıq neçənci dəfədir rus sülhməramlılarının müvəqqəti yerləşdiyi ərazilərimizdən bölmələrimizin atəşə tutulması etirazına səbəb olur. Sülhməramlılar öz üzərlərinə götürdükləri öhdəlikləri yerinə yetirmirlər. Əksinə, erməni qanunsuz silahlı birləşmələri onların hərəkətsizliyindən stimul alaraq öz terrorçu əməllərini davam etdirirlər.
Manevr.az-ın xəbərinə görə, Böyük Azərbaycan Partiyasının (BAP) sədri Elşad Musayev Cebhe.info-ya açıqlamasında bildirib ki, faktiki olaraq sülhməramlı adı altında Rusiyanın işğalçı ordusu bizim ərazilərimizdə yerləşib: 

“Mövcud reallıqlar daxilində biz bununla razılaşdıq. Bununla bağlı Azərbaycan, Rusiya və Ermənistan dövlət başçları arasında 10 noyabr Bəyannaməsi imzalandı. Ruslar bizim ərazilərimizdəki erməni silahlı dəstələrini çıxaracaqlarına dair öhdəlik götürmüşdülər. Lakin təəssüf ki, bu uzun müddət ərzində nə Rusiya, nə də Ermənistan üzərinə götürdüyü öhdəliklərini yerinə yetirib. İndiyə kimi müxtəlif dövrlərdə ermənilər tərəfindən atəşkəs pozulub, biz şəhid vermişik. Allah şəhidlərimizə rəhmət eləsin, onların qisası alınmalıdır. Düşünürəm ki, Azərbaycanın artıq antiterror əməliyyatı keçirməsinin zamanı çatıb.  Ermənilərlə başa düşdükləri dildə, güc dilində danışmalıyıq”. 
Partiya sədri deyib ki, Azərbaycan Ordusu atəş açılan yeri yerlə-yeksən etməlidir: 
“İlk növbədə atəşin haradan açıldığı və əsgərimizi kimlərin şəhid etdiyi aydınlaşdırılmalıdır. Daha sonra Ordumuz həmin yeri dağıtmalıdır. Azərbaycan Ordusu rusları hesaba almadan həmin ərazilərə hücum etməli və erməni silahlı dəstələrini tam zərərsizləşdirməlidir. Həmçinin, rus sülhməramlılarının vaxtından əvvəl Azərbaycanı tərk etməsi məsələsi də gündəmə gətirilməlidir. Çünki rus sülhməramlıları öz missiyalarını yerinə yetirmirlər. Ona görə də onların missiyasına son qoymaq tələbi qoyulmalıdır”.