Beyləqanda bir ailənin 4 üzvünü qətlə yetirən Fuad Cəlilzadə 14 ildən 20 ilədək və ya ömürlük həbs edilə bilər.Manevr.az bildirir ki, məsələ ilə bağlı oxu.az-a açıqlama verən hüquqşünas Anar Ramazanov ortada xüsusi ağır cinayətin olmasına diqqət çəkib:
“İbtidai istintaq hansı maddə ilə cinayət işi açıldığını mətbuata tam açıqlamır, amma işin hallarına baxdıqda biz burada Azərbaycan Respublikasının Cinayət Məcəlləsinin 120.2-ci maddəsində göstərilən bir neçə cinayət tərkibinin baş verdiyini deyə bilərik. Belə ki, həmin maddədə əks olunan iki və daha çox şəxsi öldürmə, xüsusi amansızlıqla adam öldürmə və tamah niyyəti ilə adam öldürmə cinayətlərinin əlamətlərinə bu hadisədə rast gəlmək mümkündür. Birinci əlamət, yəni iki və daha artıq şəxsi öldürmə artıq məlumdur və istintaq ona birmənalı qiymət verəcək”.
Hüquqşünas qeyd edib ki, işin gedişində ortada tamah və başqa niyyətlə adam öldürmə kimi epizodlar öz təsdiqini taparsa, o zaman həmin şəxs bir neçə maddə üzrə ittiham olunacaq:
“Bu zaman onun cəzası 120.2-ci maddədə nəzərdə tutulduğu şəkildə 14 ildən 20 ilə qədər və ya işin hallarından asılı olaraq ömürlük azadlıqdan məhrumetmə olacaq. Üstəlik, bu kimi hallarda təqsirləndirilən şəxsin qarşı tərəfin ailəsi ilə barışması belə onun məsuliyyətinə təsir eləmir”.
