Şair Sevinc Qəribin “Hardasa o uzaqlarda...” adlı yeni nəşr olunan ilk şeirlər kitabının növbəti təqdimatı-"imza günü" keçirilib.

Manevr.az xəbər verir ki, “Dəlidağ” Ədəbi Birliyinin təşəbbüsü, S.Vurğun adına Mərkəzi Kitabxananın təşkilatçılığı ilə düzənlənən tədbirdə müəllifin həmkarları, yaxın dostları, iş yoldaşları, oxucuları iştirak edib.
Tədbirin aparıcısı, şair Namiq Dəlidağlı Sevinc Qəribin həyat və yaradıcılığından bəhs edib, müəllifin şeirlərində yurd-yuva həsrətinin, bu ağrıdan doğan nisgilin, o uzaqlarda qalan, indi yağı əlində yağmalanan Laçının bədii ifadəsini ustalıqla qələmə aldığını dilə gətirib. Sevinc Qəribin yaradıcılığında bu mövzuların çoxluq təşkil etdiyini vurğulayıb. Onun şeirlərinin poetik xüsusiyyətlərindən danışıb.

Kitabın "ön söz" müəllifi, filologiya üzrə fəlsəfə doktoru Nailə Mirzəyeva qeyd etdi ki, “Sevinc Qəribin şeirlərinin böyük əksəriyyəti qaranlığa, gecəyə müraciətlə yazılıb. Sevinc xanımın gecələrə özünəməxsus yanaşma tərzi var. Onun şeirlərində gecənin sükutu ən yüksək səsdən daha qulaqbatırıcıdır. Hətta şeirlərdən birində bunu açıq-aşkar yazır:

Gecələr... Sükutun qulaqbatırıcı səsi,
Səssizliyin vahiməli kabusu.

Göründüyü kimi müəllif bütün ağrılarının, nisgilinin, həsrətinin ortağı bildiyi gecələrin sərhədini keçməyə, ona bütün dərdlərini xatırladan zülmətdən can qurtarmağa çalışır. O dünyaya qaranlıqdan baxır. Çünki qaranlıqdan işıq daha yaxşı görünür. Və hər qaranlığın sonunda bir işıq olduğuna ümidlə inanır.

Tənqidçi Akəm Xaqan, şairlərdən Xatirə Fərəcli, Gülnarə Cəmalləddin, Nazir Rüstəmli, Məmmədyar Məmmədyarlı, Ədalət İzəttoğlu, Elbrus Qayalı, Ənvər Məsud, Rahilə Veysəlli, S.Vurğun dına Mərkəzi Kitbxananın direktoru Yeganə Əhmədova, müəllifin iş yoldaşları Vidadi Əsədov, Nazilə Babayeva, gənc oxucu Pərvin Səlimova, ziyalılardan Qərib Səlimov, Fərhad Məhərrəmov və digərləri Sevinc Qəribin yeni kitabı haqda öz ürək sözlərini söylədi, onun özünəməxsus dəst-xətti olduğunu dilə gətirdilər. Yeni kitabının işıq üzü görməsi münasibətilə onu təbrik edib yeni yaradıcılıq uğurları arzuladılar. Müəllifin şeirlərindən nümunələr səsləndirdilər. Kiçik yaşlı rəssam Ayan Ağayeva çəkdiyi portireti S.Qəribə hədiyyə etdi. Orta məktəb şagirdi Şəms Qiyasova müəllifin "Bir qələm, bir özün..." adlı şeirini özünəməxsus tərzdə söyləyib.

Eləcə də tədbir boyu Sabir Sarvan adına uşaq poeziya klubunun üzvü olan balaca fidanlar, Sumqayıt Dövlət Universitetinin filologiya fakültəsinin tələbələri şairin şeirlərindən nümunələr söylədilər, tədbirə yeni rəng qatıblar.

Sonda S.Qərib tədbir iştirakçılarına, Mərkəzi Kitabxananın rəhbərliyinə, əməkdaşlarına öz təşəkkürünü bildirib, kitablarını hədiyyə edib, yeni şeirlərini oxuyub.

Manevr.az

(Fotolar Natiqindi)