Manevr.az bildirir ki, Musavat.com-un hüquq mühafizə orqanlarından aldığı məlumata görə, Əhməd Əhmədov gerçəkdən də ağır psixi xəstədir və onun xüsusi müalicəyə ehtiyacı olub:
Hüquq mühafizə orqanlarındakı qaynağımız deyir ki, bu proses illərlə davam edib və ağır psixi xəstə olan Əhməd Əhmədovu valideynləri gizli müalicə etdiriblər. Bu müalicədə lazım olan dərmanlar gizli yollarla, baha qiymətinə əldə edilib. Əhməd isə bəzən heç dərmanlarını içmirmiş.
Sayt yazır ki, qətldən bir gün əvvəl Əhməd Əhmədov Xətai rayonundakı polis bölmələrindən biri tərəfindən xırda xuliqanlıq hərəkətinə görə saxlanıbmış: ‘’Atası Mehman Əhmədov 35 saylı bölməyə gedib və orada polislərə yalvarıb ki, oğlunu sutkalığa salmasınlar. Deyib ki, Əhmədin epilepsiyası var, polisdə qalsa, epilepsiyası tutacaq və ölə bilər. Bununla da oğlunun azad olunmasına nail olub. Əgər o bilsəydi ki, Əhməd polisdən çıxıb 24 saat sonra bütün ailəsini qətl edəcək, yəqin ki, belə faciəvi səhvə yol verməzdi’’.
Bu məqamda artıq hər kəsə məlum olan bir detalı xatırladaq ki, Əhməd Əhmədovun 15 yaşında olarkən bir yeniyetməni xüsusi amansızlıqla bıçaqladığı və qarşı tərəfin şikəst qaldığı iddia edilir. Söylənilir ki, həmin zaman da ailəsi onu qoruyaraq qarşı tərəflə barış əldə etmiş və Əhmədi cəzadan qorumuşdu.
Mətbu orqan mötəbər qaynağına istinadən bildirir ki, valideynləri Əhməd Əhmədovdan qorxurmuş. Çünki onun tez-tez tutmaları olub və bu zaman özündə olmayıb, aqressiv davranıb, idarəolunmayan hərəkətlərə yol verib. Ona görə də valideynləri Əhmədə ayrı bir yerdə ev alıb, onu təmir etdirib, oraya köçürüblər. Üstəlik, ona maşın da alıblar, gündəlik də 30 manat pul veriblər.
Əhmədovlar əslən Qazaxın Daş Salahlı kəndindəndir.
O da məlum olub ki, Əhməd Əhmədov ona ‘’dəli’’ deyilməsindən çox qəzəblənirmiş.
Daha bir məlumat - Əhmədin qətl törətməsinin bir fraqmentini çəkib yayan isə qonşu qadın olub. O, videonu çəkməzdən öncə 102 xidmətinə məlumat veribmiş.
