Xəbər lenti
”Elə tapdığım yerdə itirdim səni “ - Nigar ARİF (şeirlər)
Manevr.az gənc şair Nigar Arifin şeirlərini təqdim edir:
Qanadlar köçmək üçündür...
Bəlkə də olduğu yerlərdən yığılıb,
Ora-bura atılan ağ-qara
daşlar kimiyik...
Ayağının altındakı
ağ-qara daşlar kimi...
Bəlkə də azadlığa can atıb
Gündən-günə çırpınan
Xəbərsiz quşlar kimiyik,
Xəbərsiz quşlar kimi...
Dünya adlı qəfəsdə
Hər dəfə özümüzə qayıdırıq
aldığımız nəfəsdə.
Gördüyümüz hər yalanı
Nə udmağı bacarırıq,
nə də ki unutmağı.
Yumruq boyda dənlər olub
Keçmir boğazımızdan,
qalır dimdiyimizdə.
Yekə bir ağrı kimi
Bardaş qurub oturur
həyat kürəyimizdə,
yaşam ürəyimizdə.
Uça bilmirik...
Nə qədər istəsək də,
Bu qapı-pəncərədən
Qaça bilmirik...
Ağlama, mənim balam, ağlama.
Əlindəki o qanadı qırılmış
quş üçün də ağlama.
Birgün ölüm özü çəkəcək
gözümüzdən pərdəni.
Yatanlar oyanacaq,
Oyananlar uçmağı öyrənəndə,
Quşlar pıçıldayacaq:
"Qanadlar bu dünyadan köçmək üçündür"...
Gözlərini yum
Gözlərini yum, balaca...
Sənin boyda olanları görmək üçün,
Qoy baxışlar öz içinə tökülsün.
Baxma nəhəng rəsmlərə,
Qarışqanı fil göstərən,
Div dediyin kölgələrə Qorxma...
kölgələrin kölgəsi olmur,balaca,
Gözlərini yum, gözlərini yum...
Sən elə şeirsən
Sən elə şeirsən...
mən səni yazsam,
İlham pərilərim sözümə baxmaz,
İnciyər şeirlər üzümə baxmaz...
Sən elə şeirsən...
mən səni yazsam,
Lal olar ən böyük natiqin dili,
Misralar kitabdan kitaba sığmaz...
Sən elə şeirsən...
ən gözəl şeir,
Məncə heç yazılmaz, yazıla bilməz!
Kor edər qələmi,
Qələm gözündə,
Quruyar mürəkkəb,
bir daha axmaz!...
Itirdim
Elə tapdığım yerdə itirdim səni...
Elə bu dəqiqə, elə bu saat.
Elə bu ürəyin cığırlarında,
Elə bu ürəyin köhnə, çat verən,
Üstünə sən çökmüş divarlarında...
Elə tapdığım yerdə itirdim səni.
Büküb əllərini, susur.., nə desin?
Çağırıb nə desin, kimə desin ki?!
Çırpır öz dizinə yumruqlarını,
Baxsan elə gözəl gülümsəyir ki...
Elə tapdığım yerdə itirdim səni.
Itirdim...
ağırdı... Bilməzsən necə ağırdı,
Daş kimi sandığın bu qəlb sinəmdə,
Əslində hər dəfə dolub bulud tək,
Səssizcə, sakitcə yagiş yağardı.
Yagış yağırdı...
Elə tapdığım yərdə itirdim səni,
İtirdim səni...
Cızma-qara
(M.Müşviqə həsr edirəm)
Qələmini əyən əydi,
Sözlər dönüb sənə dəydi.
Sağın,solun bir tələydi,
Keçdin elə,düşdün tora.
Cavan ömrünə qıydılar,
Şair gözünü oydular.
Kitabını kor qoydular,
Şeirini,üzü qara.
Bu nə qismət,bu nə bəxtdi,
Bu nə tale,bu nə dərddi.
Beləcə yırtılıb getdi,
Alnındakı cızma-qara.
Nigar Arif
Xəbəri paylaş
Çox oxunanlar
Son yüklənənlər
Axtarış
Reklam
Yazarlar
KƏRAMƏT
Emil Rasimoğlu
KƏRAMƏT
Aydın Canıyev
Aydan Ay
Emil Rasimoğlu
Sorğu
Portalımızı dəyərləndirin.
Çox oxunanlar