Xəbər lenti
Məşhur Qarabağ qazimizin ölümündən öncə yana-yana söylədiyi o MÖHTƏŞƏM SÖZLƏR
Aşağıdakı şeir “Qarabağ qaziləri” İctimai Birliyinin sədri, ölkənin tanınmış ictimai xadimi, 1-ci qrup Qarabağ qazisi Etimad Əsədovun ən çox sevdiyi misralar olub. Gənc yazar Mirbəhram Əzimbəylinin bu misraları sanki məşhur qazimizin bütün fikirlərini özündə ehtiva edib.
Qeyd edək ki, E.Əsədov 836 saylı Ağdam Ərazi Özünümüdafiə batalyonunda erməni işğalçılarına qarşı döyüşüb. 1992-ci ildə Ağdərə istiqamətində gedən döyüşdə ağır yaralanıb. Bir ayağını itirib. 1993-cü ildən Qarabağ Əlillər Cəmiyyətinin, 2002-ci ildən isə “Qarabağ qaziləri” İctimai Birliyinin sədri olub. Ağciyər xərçəngindən əziyyət çəkən E.Əsədov dünən rəhmətə gedib.
Manevr.az E.Əsədovun demək olar ki, hər gün dəfələrlə səsləndirdiyi və çox sevdiyi M.Əzimbəylinin müəllifi olduğu həmin şeiri təqdim edir:
Uzaqda
Səngər dayaz, baş uca
Uzaqda
Bu sübh namazında
Hər səcdə başqa bir ümid:
- Sağsan!
Ölümlə səni ayırar addımlar
O şahdamarından da yaxın
İlk güllə ilə bərabər açılar “Allahu Əkbər”
Başının üstündə ölüm rəqsini edərkən
Kəpənək qəlpələr
Qunut tutduğun əllərinə qonar
Ananın bəslədiyi o ac göyərçinlər
Zaman gözü yaşlı itkin bir uşaq
Sahibi üçün ağladıqlarında axarsan
Ruku...
Səcdə...
Həmin ümid:
- Sən... yenə də sağsan!
Başını qoyarkən möhürün üzərinə
Yadına düşər minalara basmış dostların
Nicat, Elçin, Ələkbər
Bir də başsız Hüseyn
Təşəhhüd...
Yenə Allahu Əkbər
İki rükətdir
Nəfəs alınar
Verilər nəfəs
Hansı sonuncudur sən bilməzsən
Nəfis yorğun, təngənəfəs
Qucaqlamaq istəyərsən, qucaqlamaq
Üşüdüklərini qucaqlamaq!
Salamlar!
Sağ və solda uyuyar qazilər
Əksikdir qollar, gözlər, əllər
Əllər, görəsən, dəyişibmi
Nişanlının əlləri, onun əlləri necədir?
Ayaqlar...
Elmanın ayaqları
Bıçaq kimi kəsər düşüncəni, arzunu, kəlamı
Onun ayaqları ermənidə qaldı
Çırpındı, çırpındı, qaldııı...
Dırnaqlarınızı bərabər tutmuşdunuz dünən
Elmanın ayaqları...
Gözlərindən süzülər
Dodaqlarından axar dua
Hara gedirsən deyə soruşmuşdun
Gülmüşdü: “Ayaqlarım hara başım da ora”
Lənət şeytana, bəzən...
Bəzən insanın başın ayağı gedən yerə gedə bilməz
Sən bilirsən, kəfəni geyməyən ölə bilməz
...
Axar
Axar...
Axar...
Allahu Əkbər
Allahu Əkbər
Allahu Əkbər!
Mirbəhram Əzimbəyli, 2012
Manevr.az
Xəbəri paylaş
Çox oxunanlar
Son yüklənənlər
Axtarış
Reklam
Kriminal
Şou-biznes
Yazarlar
KƏRAMƏT
Emil Rasimoğlu
KƏRAMƏT
Aydın Canıyev
Aydan Ay
Emil Rasimoğlu
Sorğu
Portalımızı dəyərləndirin.
Çox oxunanlar