Xəbər lenti
Simax Şeydanın “Ovçu ayı” kitabından şeirlər: UŞAQLARINIZA OXUYUN
Simax Şeyda – Azərbaycanda tanınmış 82 yaşlı uşaq şairi və yazıçıdır. Uzun illərdir Vətənindən uzaqda –Almaniyada yaşayan şairin mütəmadi olaraq Azərbaycana gəlməsi, yeni şeir və nağıllar kitablarının nəşr etdirməsi bir ənənə halını almışdır.
Simax Şeyda mənzum nağıllar da yazır. Müəllif hansı hadisədən söz açırsa, onu sadə nağıl dilinə çevirərək uşağı darıxmağa qoymur.
“Ovçu ayı” kitabı 2018-ci ilin avqust ayında işıq üzü görmüşdür. Kitab müəllif tərəfindən Yasamal rayon MKS-inə və bir neçə kitabxanaya hədiyyə edilmişdir.
Uşaqların sevimli yazıçısı S.Şeydanın bir neçə şeiri və “Ovçu ayı” nağılı ilə http://yasamal.cls.az/front/files/libraries/81/documents/958739873.pdf linkdə tanış ola bilərsiniz.
Almaniyada yaşayan həmyerlimizin bir neçə şeiri və “Ovçu ayı” nağılı “Kitabsevər uşaqlar” Facebook səhifəsində və YouTube kanalında da yerləşdirilmişdir.
“Ovçu ayı” kitabının elektron variantı ilə “Azərbaycan ədəbiyyatının virtual kitabxanası”nda tanış olmaq olar http://ebooks.azlibnet.az/index.php?q=Simax+%C5%9Eeyda
Manevr.az Simax Şeydanın yeni nəşr olunmuş “Ovçu ayı” kitabından bir neçə şeiri balalarımıza təqdim edir:
Layihənin rəhbəri,
Yasamal rayon MKS-inin direktoru,
YUNESKO-nun “İnformasiya hamı üçün” Proqramının
Azərbaycan Komitəsinin sədri Lətifə Məmmədova
Balalarımızın sevimlisi, Almaniyada yaşayan soydaşımız şair və yazıçı Simax Şeydanın yeni şeirləri
Güllərim
Bağçada gül əkmişəm,
Zəhmətini çəkmişəm,
Alın təri tökmüşəm,
Açın,açın güllərim
Ətir saçın güllərim
Boy atın gündən-günə,
Ucalın göy üzünə.
Sevinc bəxş edin mənə,
Açın, açın güllərim
Ətir saçın güllərim
Bir dəstə gül dərib mən,
Anama verdim dünən.
Anam öpdü üzümdən,
Açın, açın güllərim
Ətir saçın güllərim
14. 05. 2017
Münhen
Zəhra bala
Azərbaycanın sərhəd bölgələrinin birində
ermənilər 2 yaşlı Zəhra balaya qəsd etmişlər
Təzə-təzə yeriyirdin,
Danışırdın şirin-şirin.
Ana, nənə qucağıydı,
Zəhra bala, sənin yerin.
Yazın gözəl bir günündə
Rast gəldin sən bir gülləyə.
Qoymadılar çağırasan
“Ana” deyə, “nənə” deyə.
Haray ellər! Bir körpənin
Qəlbini qan eylədilər.
Gülüşünü, yerişini
Gülləbaran eylədilər.
Yer də, göy də bu halına
Qan ağladı, Zəhra bala.
Araz axdı coşa-coşa,
Kür çağladı Zəhra bala.
Bil ki, yerdə qalmayacaq
Sənin qanın heç bir zaman.
Qisasını alacaqdır
Bir gün anam Azərbaycan.
Uyu şirin-şirin, qızım,
Uyu torpaq beşiyində.
Sənə layla çağırsın qoy
Əsən sərin küləklər də.
28. 07. 2017
Başı uca olar
Orden alıb
Atam bu gün.
Mən də yaman
Şadam bu gün.
Təbrik edir,
Dost, tanışlar.
Bir-bir gəlib,
Gedir onlar.
Sevinc ilə
Atam deyir:
“Zəhmətimin
Bəhrəsidir”.
Zəhmət çəkib
Çalışsa kim.
Başı uca
Olar daim.
01. 06.2017
Münhen
Nə üçun belə deyir
Bir “Əlifba“ kitabı
Alginən, ana, mənə.
Vərəqləyim birbəbir
Baxım şəkillərinə.
Bacım icazə vermir,
Götürüb baxım ona.
Deyir: “Birdən cırarsan,
Get o tərəfdə oyna”.
Bilirəm ki, kitabı
Cırmaq olmaz, anacan.
Nə üçün belə deyir,
Mənə bacım Mehriban?
28.05.2017
Münhen
Bilmirsənmi
Anasından soruşdu
Bir dəfə kiçik Bağır:
–Niyə günəş səhərlər,
Ay da axşamlar çıxır?
Eşidib bu sualı
Dedi balaca Qəmər:
–Bilmirsən, yəqin onlar
Bir-birindən küsüblər?
30. 04. 2017
Münhen
Manevr.az
Xəbəri paylaş
Çox oxunanlar
Son yüklənənlər
Axtarış
Reklam
İqtisadiyyat
Ədəbiyyat
Şou-biznes
Yazarlar
KƏRAMƏT
Emil Rasimoğlu
KƏRAMƏT
Aydın Canıyev
Aydan Ay
Emil Rasimoğlu
Sorğu
Portalımızı dəyərləndirin.
Çox oxunanlar