Manevr.az xəbər verir ki, tanınmış özbəkistanlı şairə-tərcüməçi, Azərbaycan Yazıçılar Birliyinin fəxri üzvü Şaxlo Kasimova Sumqayıtın qonağı olmuşdur.

Azərbaycanın Özbəkistandakı səfirliyinin və tanınmış jurnalist Umud Mirzəyevin rəhbərlik etdiyi Beynəlxalq "Avrasiya" Mətbuat Fondunun dəstəyi ilə respublikamıza Özbəkistan nümayəndə heyətinin üzvü kimi işgüzar-yaradıcılıq səfərinə gəlmiş Şaxlo Kasimova vaxt taparaq bu gün Sumqayıtın qonağı olmuşdur.
Onu Sumqayıt Poeziya Evində Əli Kərim adına Poeziya klubunun üzvləri və şəhərimizin ziyalıları hörmətlə qarşılamışlar.

"Dəyirmi stol" arxasında keçən görüşü açan Sumqayıt Poeziya Evinin direktoru İbrahim İlyaslı Şaxlo xanımın son illərdə Azərbaycan-Özbəkistan ədəbi əlaqlərinin genişlənməsində rolundan, onun öz doğma dili ilə yanaşı Azərbaycan və rus dillərini də sərbəst öyrənərək, mükəmməl bilməsindən, müntəzəm olaraq respublikamızın şair və yazıçılarının əsərlərinin özbək və rus dilinə tərcümə edilərək, Özbəkistanın qəzet və jurnallarında, həmçinin ayrıca almanax şəklində çap edilməsi sahəsində xidmətlərindən söhbət açmışdır.

Qeyd edilmişdir ki, sumqayıtlı şair Süleyman Hüseynovun Qarabağ hadisələri ilə bağlı yazdığı sənədli romanı da rus dilinə Ş.Kasimova tərəfindən tərcümə edilərək bir müddət əvvəl çap olunmuşdur..
Şairlərdən Əkbər Qoşalı, Əli Nəcəfxanlı, Sevinc Qərib, yazıçı Almaz Bəyazid, Azərbaycanın Əməkdar jurnalisti Eyruz Məmmədov, tanınmış jurnalistlər - Zümrüd Baloğlanova, aprel şəhidləri haqqında kitabın müəllifi Aida Eyvazlı, kitabın redaktoru Suliko Daqarquliya, Səməd Vurğun adına Mərkəzi Sumqayıt kitabxanasının direktoru Yeganə Əhmədova, romanın müəllifi Süleyman Hüseynov və digərləri Şaxlo xanımın əsəri rus dilinə mükəmməl, orijinala yaxın, əsl peşəkarlıqla tərcümə etməsindən söhbət açmışlar.

Sumqayıtda yazıb-yaradan şair və yazıçıların əsərlərinin özbək və rus dilinə tərcüməsi, müasir Azərbaycan ədəbiyyatının təbliği sahəsində yorulmaz fəaliyyəti yüksək dəyərləndirilmişdir.
Şair Əkbər Qoşalı tədbir iştirakçılarının alqışları altında Şaxlo Kasimovaya Azərbaycan Yazıçılar Birliyinin fəxri üzvü vəsiqəsini təqdim etmişdir.

Özbək qonağımız onun əməyinin bu cür yüksək dəyərləndirilməsinə, ikinci vətəni hesab etdiyi Odlar Yurdunda, o cümlədən Azərbaycanın gözəl bir guşəsi olan Sumqayıtda ona göstərilən diqqət və ehtirama görə minnətdarlığını bildirmişdir.
Görüşdən xatirə şəkilləri çəkildikdən sonra Şaxlo xanım sumqayıtlı dostlarının müşayiəti ilə piyada şəhəri gəzmiş, son aylarda şəhərimizin ən gözəl istirahət guşələrindən olan Sumqayıt bulvarı ilə heyranlıqla tanış olmuşdur.

Rəhman Orxan