Sizin Reklam Burada
Xəbər lenti
16-08-2022
15-08-2022
BÜTÜN XƏBƏRLƏR

"Naşı şairlərin ilham yabısı axsayır, büdrəyir Cıdır düzündə..." - Rafiq Yusifoğlu

Tarix: 30-07-2022 22:13     Baxış: 2804 A- / A+
                                              Rafiq Yusifoğlu

Manevr.az görkəmli şairimiz Rafiq Yusifoğlunun  şeirlərini təqdim edir:


BİR OVUC TORPAQ

Ümidlə baxsam belə hər açılan səhərə,
Ağrıların əlindən qurtara bilmədim mən.
Səni mən gətirmişdim, əziz ana, şəhərə,
Bağışla ki, geriyə qaytara bilmədim mən...

Qaçqınların ahından gələrdi Vətən ətri,
Səbirlər diləyərdik sizə, 
hər gün səbirlər. 
Hamı qəribsəmişdi doğma evindən ötrü,
Qərib adam görmüşdük, –
bu da qərib qəbirlər...

İllər görüb işini, qəlbimin odu sönüb,
Daha əlimdən gəlmir sel tək coşub çağlamaq.
Qismətimdə var imiş yenidən geri dönüb,
Xarabazar yurdumda için-için ağlamaq.

Qaldım öz evimizə uzaqdan baxa-baxa, 
Baxışlarımla öpdüm daşını, divarını...
Üz də sürtə bilmədim o müqəddəs torbağa,
Aşıb keçə bilmədim illərin hasarını...

Nə qədər baxasıyıq evimizə uzaqdan?
Daha insanların da güvə düşüb səbrinə.
Əlimdən nə gəlir ki, doğulduğun torpaqdan
Bircə ovuc gətirib cəpdim sənin qəbrinə...

İndən belə çətin ki, tale sizə yar ola?
Ayrılıq ayazında baş daşın buz kimidi...
O bir ovuc torpaqla sağalarmı yaralar? –
O torpaq yox, yaraya səpilən duz kimidi...

27.12.2021


***

Çox haqsızlıq görmüşük tarixin varağında,
Çox arzu şəhid olub azadlıq sorağında.
Yetimə can deyənlər dar ayaqda mısıdıb,
Quzunu tənha qoyub ayının qabağında...

Nə vaxt son qoyulacaq bu sonsuz rəzalətə? 
Zavallı xalq nə qədər dözəcəkdir zillətə?
Oğrular doğru çıxıb, doğrular tənha qalıb,
Gücə boyun əyənlər kəm baxar ədalətə...

Zatı qırıq olandan sədaqətli yar çıxar? –
İlan yumurtasından zəhərli şahmar çıxar.
“Mənəm-mənəm” deyənlər  öz başının hayında,
Zalıma baş əyənlər məzluma qahmar çıxar? 

25.02.2022



ŞAİRLƏR ŞUŞADA ŞEİR OXUYUR

Mat-məəttəl qalıb qala qapısı,
Şuşanın təbəssüm donub üzündə.
Naşı şairlərin ilham yabısı
Axsayır, büdrəyir Cıdır düzündə...

İnsan söz deməmiş gərək düşünə,
Onsuz da bu yurda olan olubdur...
Meydanda gör kimlər döyür döşünə? –
Şəhidlər, qazilər yalan olubdur...

Vətən vətən olur qəhrəmanıyla,
Alayın üstünə tək gedənlər var.
Zəfər nəğməsini qızıl qanıyla,
Qayalar üstünə həkk edənlər var.

Ağrılar şəhərin çöküb içinə,
Hələ burda hava barıt qoxuyur.
Dərələr səsini çəkib içinə,
Şairlər Şuşada şeir oxuyur...

Hisslər his qoxulu, düçüncə yavan,
Kəsib nəğməsini sarı bülbüllər.
Görən nə düşünür Vaqif, Natəvan?
Başını bulayır xarıbülbüllər...

18.07.2022



VƏTƏN SEVGİSİ

Ey kürsülərdə sinə döyən 
mandatlı canavarlar,
Mənim vətən sevgim
sizin vətən sevginizə oxşamaz. –
Vətəni sevən 
onun var-dövlətini talayıb, 
ayrı-ayrı ölkələrə daşımaz...
Vətən mənim üçün 
nəfəsdi, candı.
Vətən gözlərimdə işıq, 
damarlarımda axan qandı...
Nə vəzifə arzulamışam,
nə axar-baxarlı torpaq 
umacağım var...
Nəyim də olmasa, 
gözütoxluğum,
ədəb-ərkanım, 
qanacağım var...
Siz isə tamah dənizində üzən 
köhnə gəmisiniz...
Vətənin cəmdəyini uf demədən 
şaqqalayan qəssab kimisiniz! –
Göylərə baş çəkən uca hasarlar 
Vətən mülkünü bəzəməz...
Mənim vətən sevgim 
sizin vətən sevginizə bənzəməz...

06.01.2022


***
Kimdi axı 
əmin-amanlıq istəyən?
Kimdi axı 
dalaşanları barışdıran?
Dünyanın hər yerində 
“sülhmərəmlı” çömçəsi deyilmi 
Müharıbə qazanını qarışdıran?...

06.01.2022



QƏHRƏMAN QATİLLƏR

Niyə özünüzə qəsd elədiniz 
ömrünüzün bahar fəslində? –
Qatil Mayakovski,
Qatil Yesenin,
Qatil Fadeyev! –
Siz qəhrəmansınız əslində...
Təzyiqlərdən cana doydunuz,
“Alın a, 
yana-yana qalın a” –
deyə-deyə 
özünüzə qıydınız, –
Siziə güvənən ölkəni
yana-yana qoydunuz....
06.01.2022


NİGARAN RUHLAR

Qələbə ilə 
öyünməyə haqlıdır, 
böyük bir xalq, 
kiçik bir ölkə.
Heç kəs zəfərimizə 
sala bilməz zərrə qədər kölgə...
Ancaq qəlbimiz 
həsrətdən elə göynəyir ki,
bilmirik yer nədir, 
bilmirik göy nədir?
Təkcə igidlərimiz deyil, 
şəhid olan kəndlərimiz, 
şəhərlərimiz,
şəhid olan vətənlı günlərimiz, 
aylarımız, illərimiz də
içimizi göyüm-göyüm göynədir...
Torpaqlarımızı 
xilas eləsək də yağılardan,
ürəklərimiz xilas olmayıb hələ 
əzablardan, ağrlardan...
Otuz ildi ki, 
mürgüləməyə çalşsaq da,
gözümüzə getməyib 
bir çimir yuxu...
Yalnız ata ocaqlarının 
işıqları yananda 
rahatlıq, dinclik tapa biləcək 
Ata- anaların, 
nənə-babaların 
nigaran ruhu... 

26.06.2022


DÖYÜŞLƏRDƏN SALAMAT ÇIXAN ƏSGƏRİN 
DÜŞÜNCƏLƏRİ


Hər kəsin bir taleyi var, –
Öz qismətinin meyvəsini 
dərir hərə;
Bizi qınamayın ölmədiyimizə, 
yaralanmadığımıza görə...
Gündə yüz dəfə öldürür adamı
Kinayəli baxışlar, 
atmacalı sözlər...
Biz eşitdiyimizi  
eşitməsin qulaqlar,
Biz gördüyümüzü 
görməsin gözlər...
Nələr çəkdiyimizi 
bir Allah bilir 
qələbə anına qədər...
Unutmayın ki, 
biz də  ləyaqətlə vuruşmuşuq,
Müharibənin əvvəlindən 
sonuna qədər...
Düşmən gülləsinə 
tuş gəlməsək də, 
Ara-sıra söz gülləsi 
yağır üstümüzə...
Gecə-gündüz boğuluruq,
Özümüz öz qəhər tüstümüzə...
Heç zaman Vətənin taleyinə 
biganə qalmamışıq,
düşmənin anasını ağladıb, 
dostu güldürmüşük!
Günahımız nədi ki, 
şəhid olmamışıq, 
qazi olmamışıq, –
Biz  Vətən uğrunda 
yaralanmasaq da, 
ölməsək də, 
Vətən uğrunda
öldürmüşək...

15.07.2022


ADAMI OLMAYAN ADAM

Deyirsən:  –Adamım yoxdu,
Qapı dalında qalmışam...
Adamlığı olmayanın
Qulu, nökəri olmuşam.

Ev verdilər bəhmənkəsə,
Ad verdilər filankəsə.
Niyə mən qaldım kənarda? –
Oy, nə qədər uman, küsən...

Addımbaşı, qədəmbaşı
Namərd kül üfürür gözə.
Xoşbəxtliə gedən yollar,
Dolamadır, deyil kəsə....

Adamın olmasa əgər,
Bəxtin gülərmi üzünə? –
Haqsızlığa boyun əyib,
Toxtaqlıq vermə özünə...

Həyatın ah-ufla keçir,
Ağlayırsan, zarıyırsan.
Hərəkət olmayan yerdə
Bərəkətmi arayırsan?

Səni adam sayarlarmı
Namərd önündə əyilsən?
“Adamım yoxdu” söyləmə,
Bəs özün adam deyilsən?

Təzə nırxlamı işləsin
İndən belə köhnə bazar? 
Sözümə məhəl qoymursan,
Tükənməyir giley-güzar;

Deyirsən:  “Bu haqsızlığı
Göydə olan kişi görmür?” –
Adamı olmayan adam,
Allah bəndə işi görmür...

17.07.2022



ŞƏHİDLƏRİN TƏŞNƏ RUHU

Laqeydlik, biganəlik 
doğmaları da 
yad eləyir;
Gör kimlər kimləri 
yad eləyir? –
İsa bulağından bir qurtum
su içə bilməyən 
şəhidlərin təşnə ruhu
İsa bulağında su yox, 
araq içənləri görüb 
fəryad eləyir....

27.07.2022


***
Bu dünya xali deyil,
Yer üzündə adam çoxdu:
Ancaq təəssüf ki,
Adam olanın adamı,
Adamı olanın 
adamlığı yoxdu...

2022








Adınız:*
E-Mail:
Şərhiniz:
  • winksmile
    laughing
    angry
Kodu yazın: *
yenilə, əgər kod görünmürsə



Çox oxunanlar




Son yüklənənlər


Axtarış

Reklam

İqtisadiyyat
Media
Ədəbiyyat
İdman
Kriminal
Şou-biznes
Elan
Yazarlar
Təqvim

«    Avqust 2022    »
BeÇaÇCaCŞB
1234567
891011121314
15161718192021
22232425262728
293031 
Sorğu


Portalımızı dəyərləndirin.



Çox oxunanlar

{sape_links}{sape_article}