“Lukanşenkonun təklifi taktiki siyasi məqsədlər güdür”.
Manevr.az  xəbər verir ki, bunu yenisabah.az-a açıqlamasında keçmiş xarici işlər naziri Tofiq Zülfüqarov deyib.
Xatırladaq ki, Belarus prezidenti Aleksandr Lukaşenko Belarus və Rusiya Regionlar Forumunun plenar iclasında bildirib: “Bu gün postsovet məkanı ölkələri, əlbəttə, öz suverenliklərini və müstəqilliklərini qorumaq istəyirlərsə, İttifaq dövləti ilə yaxınlaşmada səmimi şəkildə maraqlı olmalıdırlar. Əminik ki, yalnız birlikdə qlobal çağırışlara qarşı müqavimət göstərmək olar”.
Azərbaycan da bu İttifaqa qoşulmalıdırmı? Bunun ölkəmizə faydası, yoxsa zərəri olacaq?
Mövzunu şərh edən T. Zülfüqarov, ilk növbədə, Rusiya və Belarusun birləşmə və ittifaq dövləti yaratma səyləri barədə bəyanat verdiyini, ancaq bu layihənin hələ də tamamlanmadığını vurğulayıb.
“Rusiya tərəfindən ittihamlar səslənir ki, Lukaşenko özü bu müttəfiq dövləti yaratmaq istəmir. Çünki ittifaq dövləti yaradıldıqdan sonra ümumi dövlət başçısı olmalıdır.
Bu baxımdan da məsələdə siyasi problemlər mövcuddur. Ona görə də layihənin 15 ildən çoxdur ki, icrası uzanır və nəticəsinin uğurlu olacağına heç kəs inanmır”.
T. Zülfüqarov əlavə edib: 
“İndiki mərhələdə Rusiya və Belarusun “İttifaq dövləti” və buna bənzər layihələrə qoşulma Lukanşenkonun irəli sürdüyü taktiki siyasi məqsədlər güdür. Fikrimcə, bu layihə tamamlansa belə, keçmiş sovet respublikalarının simasında onun başqa üzvü olmayacaq”.