Bakı şəhəri, Nəsimi rayonu, Novruzov qardaşları küçəsi, ev 78-də yaşayan Musayeva Sultan Şura qızı Prezident İlham Əliyevə və Birinci xanım Mehriban Əliyevaya təkrar müraciət edib.

Çox hörmətli möhtərəm Prezidentimiz İlham Əliyev və Birinci Vitse-prezidentimiz Mehriban xanım Əliyeva!

Birinci müraciətimdə 1988-ci ildə erməni zülmü ilə yurd-yuvasından didərgin düşmüş sadə bir ailənin üzvü, bir ana olaraq diqqətinizə çatdırmışdıq ki, övladlarımdan biri – 2007-ci il təvəllüdül Kənan Musa oğlu Musayev ta 6 ayləğından bu gündək, yəni ötən 13 ildə Azərbaycan da daxil olmaqla, Rusiya və İranda düz 17 dəfə gözlərindən əməliyyat olunub. Həkimlər onun hər iki gözünə anadangəlmə qlükoma (göz) diaqnozu qoyublar, onun da burada müalicəsinin olmadığını deyirlər. Hazırda müalicəsi davam edir, hər üç aydan bir məcbiri əməliyyata salınır. Belə bir vəziyyətdə, o, əlillər üçün nəzərdə tutulan məktəbdə oxuyur.

Yəni bütün diqqətimizin balaca övladımızın üzərində olduğu anda, böyük oğlum – 5 mart 2004-cü il təvəllüdlü 10-cu sinif şagirdi Sənan Musa oğlu Musayevin də bu ilin yanvarın 10-da qəfildən ürəyində çox ciddi problem yarandı. Təcili xəstəxanaya apardıq. İlkin müqayinədən sonra oğlum dərhal Respublika Uşaq Kliniki Xəstəxanasının reanimasiya şöbəsinə ağır vəziyyətdə yerləşdirildi.

Həkimlərin analizinə görə, Sənan Musayevin ürəyinin 80 faizi işləmə qabiliyyətini itirib, sol boşluqlarda ciddi böyümə gedib, mədəciyi ciddi dilatasiya olunub. Rəsmi son dəqiq diaqnoza görə, oğlum belə ürəklə yaşaya bilməz, ona mütləq ürək köçürülməlidir.

Biz hər ehtimalları nəzərə alaraq, digər tanınmış ürək həkimlərinə, o cümlədən milliət vəkili, məşhur ürək həkimi Rəşad Mahmudova da müraciət etdfik. O, bizimlə görüşdə dedi ki, bəli, Sənana mütləq ürək köçürülməlidir, o da burada - Azərbaycanda DONOR olmadığına görə mümkün deyil.

Beləliklə, biz yanvarın 19-da Sənan Musayevin vəziyyətinin daha ağırlaşmasından sonra həkimlərin məsləhəti ilə onu Respublika Uşaq Kliniki Xəstəxanasından Bakı Sağlamlıq Mərkəzinin reanimasiya şöbəsinə köçürdük. Burada da həkimlər birmənalı şəkildə oğluma xaricdə ürək köçürülməsi üçün rəsmi rəy veriblər. Hal-hazırda oğlum xaricə aparılana qədər ciddi rejimdə bu xəstəxanada müalicə olunur.

Çox hörmətli Prezidentimiz və Mehriban xanım Əliyeva, sizə ilk müraciətimizdən sonra bizə TƏBİB-dən zəng gəldi. Oğlumuzun müayinə olunması üçün Topçubaşov adına xəstəxanaya gəlməyimiz istənildi. Orada da uşaq ürək cərrahiyyə şöbəsinin müdiri müvafiq analizlər və ekokardioqrama əsasında oğlumuzun təkcə ürək klapanın dəyişilməsi üçün burada əməliyyatın həddən artıq riskli olması haqda rəsmi rəy verdilər. Bildirilidi ki, tək elə bu əməliyyat xəstənin masada qalması ilə bitə bilər. Yəni, 16 yaşlı övladımızın yaşaması üçün ona mütləq xaricdə ürək köçürülməlidir.

Bu rəsmi rəyi hazırda oğlumun qaldığı Bakı Sağlamlıq Mərkəzinin həkimləri də ilk gündən deyiblər. Açıq deyirlər ki, 20 faizə qədəri işləyən uşağın ürəyindəki problemlərin bəzilərini aradan qaldırmaq üçün əməliyyata yatırılması belə, onun ölümünə bərabərdir.

Həkimlərin məsləhəti ilə biz ilkin olaraq bu müalicə və ürək köçürülməsi ilə bağlı Belarusdakı Kardiologiya Elmi Mərkəzinin həkimləri ilə danışdıq. Onlara müvafiq sənədlər göndərdik. Bizdən oğlumun mədə və dişindən də analiz istəyib, Azərbaycandakı həkimlərin diaqnozunu təsdiqlədilər,

Bildirdilər ki, övladımıza ürək köçürüb, onu həyata qaytara biləcəklər. Ancaq bunun üçün elə müalicə xərci (120 min dollar) deyildi ki, inanın, bu məbləği bütün daxili imkanlarımızı səfərbər eləsək də, çox təəssüf ki, tam qarşılaya bilmirik.

Çox hörmətli Prezidentimiz, çox hörmətli Mehriban xanım Əliyeva, belaruslu həkimlər övladma ürək köçürülməsi üçün 120 min dollara yaxın vəsait tələb olunduğunu deyiblər. Biz bu məbləğin təxminən yarısını -60 min dollarını düzəltmişik. Lakin təxminən 60 min dollarını bütün imkanlarımızı səfərbər eləsək də, düzəldə bilmirik.

Ona görə, Sizə təkrar müraciət edir, yalvarıram: son ümidimiz Sizədir.

İnan, hər iki övladımın xəstəliyi bizi maddi baxımdan çox ağır vəziyyətə salmasaydı, işinizin həddən artıq çox olduğu bir ərəfədə, böyük acılar içində olan bir ana olsam da, Sizi qətiyyən narahat etməzdik. Amma çox çıxılmaz vəziyyətdə qalmışıq. Bizə ürək köçürülməsi üçün tələb olunan 120 min dolların 60 mini üçün köməyə ehtiyac var. Bu, iki övladı da xəstə olan bir ananın övladı üçün son çırpınışlarıdır.

Ona görə, bir ana kimi Sizə üz tutub, xahiş edir, yalvarıram: hal-hazırda Bakı Sağlamlıq Mərkəzində ağır vəziyyətdə müalicə olunan 10-cu sinif şagirdi olan oğlum Sənan Musayevin Belarusa aparılması və orada ürək köçürülməsini şəxsi nəzarətinizə götürüb, onun yaşamasına, həyata dönməsinə kömək edin.

İnanırıq, əminik ki, Siz bizim bu müraciətimizi tezliklə nəzarətinizə götürüb, 16 yaşlı Sənan Musayevin müalicəsi ilə maraqlanıb, dərhal müvafiq tapşırıqlar verəcəksiniz.

Göydə Allah, yerdə Sizdən başqa heç bir dayağımız, güman yerimiz yoxdur. Ona görə, bir daha yalvarıram sizə, bizə yardım əlinizi uzadıb, oğlumun həyata qayıtmasına köməklik göstərəsiniz. Əminik ki, övladımızın sağalıb, ailəmizə, məktəbli dostlarlnın arasına dönməsi üçün əlinizdən gələni edəcək və bizi sevinc gözyaşlarına qərq edəcəksiniz. /mia.az/

Allah Sizə yar və yardımçı olsun!

Böyük hörmətlə; Musayeva Sultan Şura qızı

Əlaqə nömrələri: 055 731 30 51

06 fevral 2020-ci il"

Manevr.az