Nizaməddin Quliyev, Qoca Səmədov kimi sabiq icra başçılarının vəzifə səlahiyyətlərindən sui-istifadə etmə, külli miqdarda rüşvət alma, mənimsəmə və digər faktlara görə Dövlət Təhlükəsizliyi Xidməti tərəfindən saxlanılması ölkə gündəmini zəbt edib. İki gündür sosial şəbəkələrdə açılan müzakirələr də harınlamış icra başçılarının məsələsi barəsindədir.

Prezident icra başçılarına dəfələrlə xəbərdarlıq etsə də, çağırışlar ünvanlasa da, bəziləri necə deyərlər, öz bildiyini etməkdədir.

Manevr.az xəbər verir ki, V çağırış Milli Məclisin deputatları modern.az-a bu məsələlərdən danışıblar.

Fəzail Ağamalı: “Əlbəttə, baş vermiş bu hadisə çox ciddi təəssüf doğurur. Ona görə ki, bəzi məmurlar öz işlərini ölkədə gedən yeniliyin, inkişafın məntiqinə uyğun qura bilmir, ya da qurmaq istəmirlər. Yenə köhnə metodlarla işləməklə öz səlahiyyətlərindən sui-istifadə edir, ciddi qanun pozuntularına yol verirlər. Korrupsiya, rüşvətxorluq belə insanların həyat tərzinə çevrilib və nəticə də bəllidir”.
Fəzail Ağamalı qeyd edib ki, ölkə prezidenti 2018-ci ilin aprel ayından başlayaraq Azərbaycanda ciddi islahatlara start verib: “Bununla bağlı dəfələrlə fikirlərimizi söyləmişik. Bu islahatlar Azərbaycanı daha yüksək inkişaf səviyyəsinə qaldırcaq və ölkə preizdentinin niyyəti, hədəfi də budur. Baş verən bu kimi hallar başa düşülən və bağışlanan deyil. Prezident ayrı-ayrı şəxsləri vəzifəyə təyin edəndə onların diqqətinə çatdırdı ki, ölkədə korrupsiya və rüşvətxorluğa qarşı amansız mübarizə başlayıb. Prezident qeyd etmişdi ki, kim korrupsiyaya yol versə, xalqa xidmət etməsə, ciddi şəkildə cəzalanacaq. Bütün bu mesajları nəzərə almayanlar ciddi formada cəzalanır və onların yolu ilə gedənlər də, şübhə etmirəm ki, öz cavablarını alacaqlar. Azərbaycan artıq başqa bir ölkədir! Məmurlar yeni Azərbaycana adaptasiya olmağı bacarmalıdırlar. Əgər bunun əksi olacaqsa, onlar da yaxın zamanda öz cəzalarını alacaqlar. Qeyd edim ki, Ağstafanın və Yevlaxın sabiq icra başçısının məsələsinə DTX-nın rəhbərlik etməsinı adi yanaşmaq olmaz”.

Elman Məmmədov: “Hamıya məlum olan bir həqiqət var ki, hər kəs cəmiyyətdə öz əməlləri ilə tanınır. Bəzən bu kimi insanlar elə bilir ki, onların əməlləri gizli qalır və heç kimin bundan xəbəri yoxdur. Lakin uca Yaradan, Tanrımız hər şeyi görür. Hər bir insan elədiyi əməllərin cavabını alır”. Elman Məmmədov qeyd edib ki, Prezident illərdir bəyan edir ki, biz korrupsiyaya qarşı barışmaz mübarizə aparırıq: “Lakin görünür ki, bəzi məmurlar prezidentin bu bəyanatlarından nəticə çıxara bilmir. İstənilən qanunsuzluğunun qarşısı ciddi şəkildə alınır. Ağsatafa və Yevlaxın icra başçılarının da həbs olunması mənə elə gəlir ki, digər bütün vəzifəli şəxslərə bir mesajdır. Hesab edirəm ki, bu həbs məsələsindən sonra çoxlarının yuxusu qaçıb, kürkünə birə düşüb. Dövlət sənə yetəri qədər maaş ayırır və sən bunların çərçivəsində addım atmalısan. Bəzi məmurların aldıqları ev, maşın maaşlarına uyğun olmalıdır ki, sonra bu kimi hallarla rastlaşmasınlar. Əgər aldığın maaşından artıq nələrsə etmisənsə, deməli ya dövlətin, ya da vətəndaşın cibinə girmisən. Düşünürəm ki, bunlar çox ibrətamiz və tərbiyələndirici tədbirlərdir”.

Aqil Abbas: “Belə adamlar yerlərində olmayan şəxslərdir. Hansı ki, vəzifəyə təyin edilirlər, işlərini özləri kimi qururlar. Gizli əməllərin üstü nə olur olsun, bir gün açılır. “Oğurluğun ömrü 40 gün olur” deyirlər. Ölkədə çox böyük islahat gedir. Bundan bir müddət əvvəl bir neçə rayonda kart paylayan Sosial Müdafiə Fondunun işçiləri də həbs olundular. Görünür ki, dərs götürmürlər”.

Manevr.az