Mövsüm Səmədovun isə aclıq aksiyasına Penitensiar Xidmətdən reaksiya

Sentyabrın 2-də Bakı Apelyasiya Məhkəməsində AXCP sədri Əli Kərimlinin köməkçisi “Azadlıq” qəzetinin yayım direktoru, Faiq Əmirlinin şikayətinə baxılıb. Qapalı keçirilən məhkəmə iclasına Faiq Əmirlinin özünü də gətiriblər. O, məhkəmədə çıxışında ittihamın absurd olduğunu, Fətullah Gülən şəbəkəsilə heç bir əlaqəsi olmadığını bildirib.

Həsən Əhmədovun sədrlik etdiyi məhkəmə heyəti apelyasiya şikayətini təmin etməyib.

F.Əmirlinin vəkili Aqil Layıcov “Azadlıq”a açıqlamasında bildirib ki, bu qərar onlar üçün gözlənilməz olmayıb: “Bizim onsuz da apelyasiya məhkəməsindən ədalətli, obyektiv qərar çıxarılması ilə bağlı gözləntimiz yox idi. Sadəcə, Avropa Məhkəməsinə müraciət etmək üçün bu instansiyanı keçmək tələb olunur. Gözlədiyimiz kimi də oldu”.
Vəkil əlavə edib ki, qərarı alandan sonra F.Əmirli barəsində həbs qərarından Avropa Məhkəməsinə şikayət göndərəcəklər.

REAL sədri İlqar Məmmədovun ailəsi sentyabrın 2-də onunla görüşüb. Görüş barədə REAL sədrinin həyat yoldaşı Vəfa Məmmədova “Yeni Müsavat”a bunları deyib: “Vəziyyəti yaxşı idi. Elə bir problem yoxdur. Ali Məhkəmədə keçiriləcək prosesin hələ də günü məlum deyil”.

Qeyd edək ki, Qobustan həbsxanasında cəza çəkən Azərbaycan İslam Partiyasının sədri Mövsüm Səmədov avqustun 29-dan müddətsiz aclıq aksiyasına başlayıb. M.Səmədov aksiya keçirməsinə səbəb kimi bu ayın 26-da keçiriləcək referenduma etirazını göstərib.
Ədliyyə Nazirliyinin Penitensiar Xidmətinin mətbuat katibi Mehman Sadıqov AİP liderinin aclıq aksiyası keçirməsi ilə bağlı bunları dedi: “Qanunvericiliyə görə, məhbus aksiya barədə həbsxana rəhbərliyinə müraciət etməlidir. Müraciətdə aksiyanın səbəbi göstərilməlidir. Əgər o həbsxana rəhbərliyinə müraciət edibsə, qanunvericiliyə uyğun şəkildə rəhbərlik addımlarını atacaq”.

Azadlığa çıxmasına 10 ay qalmış, iyun ayında verilən Amnistiya Aktına düşən Müsavat başqanının müavini Fərəc Kərimli məlum olmayan səbəblərdən azad edilmir. Saxlanıldığı 14 saylı cəzaçəkmə müəssisəsində amnistiyanın icrası davam etsə də, bu, vicdan məhbusuna şamil olunmur. Başqan müavinin atası Raqif Kərimli son durumla bağlı bunları dedi: “Elə bir yenilik yoxdur. Azadlığa çıxmasını gözləyirik, amma amnistiya düşdüyü deyilsə də azad olunmur. Təsəvvür edin ki, azadlığa çıxmalarına 1 il 3 və ya 4 ay qalanlar artıq amnistiya qərarı ilə azad olunublar. Amma Fərəcin 10 ayı qalıb, azadlığa buraxmırlar. Özü də sentyabrın 2-də zəng etmişdi. Dedi ki, amnistiya ilə tez-tez məhbuslar azad edilir, amma cəza müddəti azad edilənlərin müddətindən az qalsa da, buna qərar şamil olunmur. Yenə də amnistiyanın icra müddəti bitənə qədər gözləməyə məcburuq”.

Manevr.az