Braziliyada Heydər Əliyev İli və Azərbaycanın bu ölkə ilə diplomatik münasibətlərin qurulmasının 30 illiyi qeyd edilib -ŞƏKİLLƏR

Konsertin proqramında Sevil Əliyevanın “Ana” mahnısı, Fikrət Əmirovun “Sevil” operasından Dilbərin ariyası, eləcə də Abuzər Manafzadənin üç hissədən ibarət balaban konserti səsləndirilib. Həmçinin, K. Danger-Manafzadənin bəstələdiyi “Azərbaycan, gözəlsən” mahnısının ifası baş tutub. Xalq artisti, bəstəkar Sərdar Fərəcovun piano və simli alətlər üçün aranjimanında V.A.Motsartın “Türk marşı”, Vaqif Mustafazadənin Fortepiano və kamera orkestri üçün caz üslubunda konserti və A.Manafzadənin “Xocalıya” adlı əsəri ifa edilib. 

Konsert tamaşaçılar tərəfindən böyük maraqla qarşılanıb. Balaban və nağara xalq çalğı alətlərinin simfonik orkestr ilə yaratdığı ahəngdar səslənmə braziliyalı dinləyicilərə xüsusi zövq verib. Konsertdə ööləmizdən xüsusi qonaq qismində Milli Məclisin millət vəkili, Azərbaycan-Braziliya Parlamentlərarası Dostluq Qrupunun sədri Müşfiq Məmmədli iştirak edib. Braziliyanın turizm nazirinin müavini, digər hökumət rəsmiləri, senatorlar, federal deputatlar, o cümlədən Azərbaycan-Braziliya Parlamentlərarası Dostluq Qrupunun həmsədri deputat Klaudio Kajado və diplomatik korpus, mədəniyyət təsisatları, tələbələr və yerli ictimaiyyət iştirak edib.

Qeyd edək ki, bu tədbirlər Braziliyada Ümummilli Lider Heydər Əliyevin 100 illiyinə həsr olunmuş və il ərzində Səfirlik tərəfindən təşkil olunmuş silsilə tədbirlərin yekunudur. Belə ki, bu il martın 12-də Rio De Janeyro şəhərində Xalq artisti, dirijor Yalçın Adıgözəlovun rəhbərliyi ilə Braziliya simfonik orkestrinin konserti, mayın 24-də isə paytaxt Braziliada Xalq artisti Ənvər Sadıqov və Əməkdar artist, “Montrö Caz Festivalı”nın qalibi Emil Əfrasiyabın konserti keçirilib.