Müşfiq Məmmədli: "Ermənistan hökuməti anlamalıdır ki, ölkə başçımızın hər bir vədinin arxasında konkret əməl dayanır"

Manevr.az xəbər verir ki, bunu Milli Məclisin deputatı Müşfiq Məmmədli qeyd edib. Deputat bildirib ki, bəzi Avropa ölkələri yaxşı başa düşdü ki, Cənubi Qafqaz regionunda yaranmış yeni situasiya bu dövlətlərin regionda nüfuzunun itirilməsi demək idi. Deməli, onları narahat edən insanların, xalqların taleyi deyil, öz dövlət maraqları oldu: "Bu müddət ərzində Cənab prezident İlham Əliyev regionda balanslaşdırılmış siyasət apardı və Azərbaycanın ən etibarlı tərəfdaş olduğunu sübut etdi. Ötən 3 ilə yaxın zamanda Azərbaycan dövlət olaraq azad edilmiş ərazilərdə abadlıq quruculuq işləri ilə yanaşı xarici diplomatiyada rəsmi Bakının mövqeyini yüksək səviyyədə qorudu. Lakin buna baxmayaraq erməni tərəfi durmadan manipulyasiyaya gedir, hər addımda revanşist istəklərindən əl çəkmirlər. Son ümid olaraq BMT-nin Təhlükəsizlik Şurasına bel bağlamaları da puç oldu. Ermənistan hökuməti anlamalıdır ki, ölkə başçımızın hər bir vədinin arxasında konkret əməl dayanır.

Məhz buna görə də cənab Prezidentin verdiyi bütün vədlər gerçəkliyə çevrilir. Azərbaycanı qarşıdakı illərdə daha möhtəşəm uğurlar gözləyir. Ali Baş Komandanımızın rəhbərliyi ilə işğaldan azad edilmiş ərazilərimiz sanki yenidən doğulacaq, canlanacaq, dirçələcək. Azərbaycanın ayrılmaz hissəsi və ən gözəl güşələrindən biri olan Qarabağ əsl cənnət məkanına çevriləcək", M.Məmmədli vurğulayıb.