“Çin və Azərbaycan hər zaman ərazi bütövlüyünü əsas tutub” – Millət vəkili

“Azərbaycan və Çin hər zaman ikitərəfli münasibətlərdə və beynəlxalq təşkilatlarda ölkələrin ərazi bütövlüyü və suverenliyi prinsipindən çıxış ediblər. Cənab Prezident İlham Əliyevin Çinin “China Global Television Network” televiziya kanalına müsahibəsində də bu məqam xüsusi vurğulandı. Bu cür sağlam mövqe iki ölkə arasındakı münasibətlərdə hər zaman mühüm məsələ olub.

Manevr.az bildirir ki, bu fikirləri Turkustan.az-a açıqlamasında Milli Məclisin deputatı Aqil Məmmədov bildirib.

Millət vəkilinin sözlərinə görə Azərbaycan-Çin münasibətlərinin yüksək səviyyədə qurulması Ulu Öndər Heydər Əliyevin adı ilə bağlıdır: “İki ölkə arasında rəsmi şəxslərinin qarşılıqlı səfərləri diplomatik əlaqələrin daha da möhkəmləndirilməsinə xidmət edib. 1994-cü ilin martında Heydər Əliyev Çin Xalq Respublikasında rəsmi səfərdə olmuşdur. Cənab Prezident müsahibəsində qeyd etdi ki, Ulu Öndər Heydər Əliyev Azərbaycan-Çin münasibətlərinin inkişafında çox vacib rol oynayıb. Onun Çinə səfərləri və Çinin rəhbərləri ilə görüşləri əməkdaşlığımızın çərçivəsini yaratdı. O vaxtlar dünyada Azərbaycan o qədər də tanınmırdı. Bu gün əməkdaşlığın gündəliyi 30 il əvvəlkindən daha genişdir. Bu münasibətlər qarşılıqlı hörmət və dostluq üzərində qurulub. Heydər Əliyev müxtəlif dövrlərdə Çinin inkişafı ilə bağlı yaxşı məlumatlı idi. Ulu Öndər SSRİ Nazirlər Soveti Sədrinin birinci müavini vəzifəsində çalışıb və Çin nümayəndələri ilə bir çox görüşlər keçirib. O, ölkənizin dinamikası və inkişafından yaxşı xəbərdar idi. Bundan sonra qarşılıqlı səfərlər, əməkdaşlıq imkanları ilə intensiv xarakter alıb. ‎Azərbaycan Prezidenti İlham Əliyev də Çinlə münasibətlərin inkişaf etdirilməsinə hər zaman diqqətlə yanaşıb. 2005-ci ilin mart ayında Prezident İlham Əliyev Çində rəsmi səfərdə olub. Prezident Azərbaycanın Çinlə əlaqələrə xüsusi önəm verdiyini vurğulayaraq, Azərbaycan rəhbərliyinin Çinin işgüzar dairələrinin ölkə iqtisadiyyatının müxtəlif sahələrinə sərmayə qoymasına köməklik göstərəcəyini deyib”.

Azərbaycanla Çinin bir sıra məsələlərə münasibətdə eyni mövqedə çıxış etməsi ilə bağlı Prezidentin fikirlərini xatırladan A.Məmmədov qeyd edib ki, burada ilk mövbədə suverenlik, müstəqillik, ərazi bütövlüyü, digərlərinin daxili işlərinə qarışmamaq məsələlərində üst-üstə düşür. Eyni zamanda, ölkələrimizi gələcəkdə daha da birləşdirəcək meydana gələn yeni nəqliyyat marşrutlarını görürük. Bunun özü də regional təhlükəsizliyə və sabitliyə böyük töhfə olacaq: “Bundan başqa, partiyalarımız arasında təmaslar, əməkdaşlıq telləri ikitərəfli münasibətlərimizə öz töhfəsini verməkdədir”.

Eltac Zülfüqaroğu/Turkustan.az