(“Həyat düşüncələrim” seriyasından)

Lənkəran Şəhər İcra Hakimiyyətinin başçısı Taleh Qaraşovu mən o, rayonun başçısı təyin olunduğu gündən tanıyıram və aramızda da dostluq, qardaşlıq münasibətləri mövcuddur. Çoxları da bu dostluq və qardaşlığımıza qibtə ilə yanaşır. Qoy qibtə ilə yanaşsınlar. Gözəl ziyalı ilə dostluq etməkdə mən heç də yanılmamışam. Çünki bu insan o qədər mədəni, istiqanlı, gözəl natiq, Prezident tərəfindən ona tapşırılan işə məsuliyyətli və ciddidir ki, elə ilk gündən bir yazıçı- publisist, jurnalist kimi diqqətimi çəkdi. Bu diqqət o səviyyəyə çatdı ki, mən hətta onun kəndlərdəki səyyar görüşlərini belə diqqətlə izləyir, gələcək kitablarım üçün qeydlər aparır, araşdırmalarım müsbət nəticə verirdi. Taleh Qaraşov hörmətli Prezidentimizin Sərəncamı ilə rayonun başçısı təyin olunduğu gündən Lənkəranın dinamik inkişafında sanki bir sıçrayış oldu. İlk gündən rayonumuzun kəndlərində və onun peyk şəhəri olan Liman şəhərində səyyar görüşləri zamanı sakinlərin dərd-sərini dinləyən rayon başçısı çox böyük işgüzarlıqla məsələlərin yerindəcə həll olunmasına çalışırdı. Az bir vaxt ərzində Lənkəran şəhərinin struktur inkişafında köklü dəyişikliklər baş verdi. 31 iyul 2012-ci ildə Azərbaycan Respublikasının prezidenti cənab İlham Əliyev Lənkərana səfərindəki çıxışında demişdi: “ Çox şadam ki, Lənkəranda işlər yaxşı gedir. Rayon inkişaf edir, şəhər gözəlləşir, abadlaşır, gözəl binalar ucaldılır... Ona görə mən əminəm ki, Lənkəranda hələ görüşlərimiz, açılışlar, tədbirlər çox olacaqdır...”

Hələ o zaman İcra başçısı Taleh Qaraşov Prezidentin görülmüş işlərə dəyər verməsi haqqında fikrini belə ifadə etmişdi: “Azərbaycan Respublikasının prezidenti cənab İlham Əliyevin şəhərimizə növbəti səfəri zamanı Lənkəranın xoş soraqlı sabahı ilə bağlı söylədiyi fikirlər bir daha sübut etdi ki, Azərbaycanın hər yeri kimi, Lənkəranın dinamik inkişafı bundan sonra da davam edəcək, şəhərimiz daha da gözəlləşəcəkdir.” Taleh Qaraşov hələ fəaliyyətinin iki ildən artıq bir dövründə rayonun ərazisində olan əksər kənd və qəsəbələri qarış-qarış gəzmiş və bu səyyari görüşlər ona rayonun dinamik inkişafında yeni-yeni uğurların qazanılması üçün şəraiti öyrənməyə köməklik göstərmiş, rayonun iqtisadiyyatının daha da inkişaf etdirilməsi naminə ölkəmizin prezidenti cənab İlham Əliyevin ideyalarının rayonda bərqərar olunmasına, çox əhəmiyyətli sosial yönümlü infrastruktur layihələrin icrasına başlamasına, əhalinin sosial həyatında yaxşılığa doğru yönələn dəyişmələrin aparılmasına zəmin yaratmışdır. İcra başçısının səyyar görüşlərini müntəzəm olaraq həmişə mətbuatdan izləmiş, bu görüşlərin bir çoxunu xronoloji ardıcıllıqla kitabıma daxil etmiş, məqalələr yazmış, internet səhifələrində fəal mövqe göstərmişəm. Əlbəttə, bu görüşlərin sayı çoxdur və bunların hamısı haqqında danışmaq qeyri-mümkündür. Lənkəranda cənab prezident İlham Əliyevin tapşırıqları ilə görülmüş işlər o qədər çoxdur ki, ağa qara deməyə adət edənlər də mənə elə gəlir ki, nəhayət, insafa gəlib yaxşı işlərə “yaxşı” deyəcəklər. Ümumiyyətlə, insanlar yaxşıya yaxşı deməyi bacarmalıdırlar. Bir anlıq Heydər Əliyev Xatirə parkına tamaşa edin. Ötən on il əvvəlkindən fərqli olaraq meydanın yeni təmirində daş plitələri çox yerdə yaşıllıq, ağac, gül kolları, yaşıl ot örtüyü əvəzləyib. Bura lənkəranlıların istirahət etdiyi ən gözəl parkdır. Lənkəran qədim tarixi olan Odlar yurdunun dilbər guşəsidir, Azərbaycanımızın cənub mirvarisidir. Bir tərəfində Xəzər dənizi, bir tərəfində-günbatanı sanki yerində donub qalmış nəhəng dalğaları xatırladan qocaman Talış dağları, bir tərəfində dünya quşlarının qışladığı Qızılağac qoruğu, bir tərəfində də dünya şöhrətli Hirkan qoruğu yerləşir. Bu diyarda hər bir ağaca, hər bir çiçəyə qayğı var. Xəzər dənizi qırçın ləpələrini sahilə döyəcləyəndə Kiçik bazarın dənizə yaxın ərazisində yaşayan sakinlərinə sanki laylay çalır. Balıqçılar iri kolazlarla sahilə yan alarkən üzlərindəki sevinci duymamaq olmur. Çünki uğurlu balıq ovundan hamı xoş ovqatla qayıdır. Lənkəranlılar qonaqpərvər adamlardır. Onlar ən yaxşı otaqlarını qonaqları üçün ayırar, ən ləziz yeməkləri də qonağa yedizdirərlər. “Xan lənkəranlı” ifadəsinə kimsənin şübhəsi ola bilməz. Bu gün bol nemətli Lənkəran özünün ən gözəl günlərini yaşayır. Burada son on ildə görülmüş işlərə qısa nəzər yetirək. Yeni su-kanalizasiya sisteminin quraşdırılması işlərinin başa çatdırılması dövlət tərəfindən olsa da, məhz Taleh müəllimin işlədiyi dövrlə bağlıdır. Dəyəri 210 milyon manat olan bu layihə indiyə qədər rayonun sosial-iqtisadi inkişafına qoyulmuş bütün investisiyaların cəmindən dəfələrlə çoxdur. Layihədə nəzərdə tutulan işlər nəticəsində su-kanalizasiya sistemi şəhərin və rayonun 40 illik ehtiyacını ödəməklə, bu sahədəki nəhəng sosial problemi bir dəfəlik həll etmişdir. Ən əsası odur ki, hazırda Lənkəran əhalisi məişətdə dünya standartlarına uyğun səviyyədə təmiz sudan istifadə edir. Gün gələr, yeni layihələr meydana gələr və mənim yaşadığım Liman şəhərində biz də o şəffaf sudan içərik. Çünki Liman şəhərinin çox ərazisində şirin su yoxdur. Qumbaşı kəndi isə illərdir ki, sudan korluq çəkir. İcra başçısı sakinlərin bu dərdini çox gözəl başa düşür və bu vacib məsələni həmişə əlaqədar təşkilatlar qarşısında qaldırır. Hamı başa düşür ki, bu, asan məsələ deyil. Bundan ötrü dövlət tərəfindən ayırmalar olmalıdır. Ancaq hamı inanır ki, vaxt gələcək, bu arzumuz da reallaşacaq. Regionların sosial-iqtisadi inkişafı haqqında ikinci Dövlət Proqramı respublikamızın hər yerində olduğu kimi, Lənkəranda da uğurla həyata keçirilmişdir. Rayonda məhz Taleh müəllimin işlədiyi illərdə qazlaşdırma və elektrik xətlərinin kabelləşdirilməsi işləri demək olar ki, başa çatdırılmışdır. Ələt –Astara, şəhərin baş küçələri, Zövlə-Boladi, Liman-Nərimanabad kənd yolları yüksək səviyyəli isti asfaltla örtülmüşdür. Bundan əlavə, rayonun əksər kəndləri də asfaltlaşdırılmışdır. Bu işlər yenə də davam etdirilir. Aqrar sahəyə maraq bir qədər də artmış, çayçılığa, çay istehsalına, qeyri-neft sahələrinə diqqət artırılmışdır. Hirkan, İstisu qəsəbələri və Girdəni kənd ərazisində 150 hektar yeni çay plantasiyası salınmışdır. Son 10 il ərzində Lənkəranda çox işlər görülüb, neçə-neçə təhsil ocaqları, şəhid və qazi ailələri üçün yaşayış binaları, yaraşıqlı marketlər tikilib. İndi Lənkəran gündən-günə gözəlləşir. Hər yerdə abadlıq işləri gedir, səliqə-sahman göz oxşayır. Bütün bu işlərin görülməsində cənab prezident İlham Əliyevin göstəriş və tapşırıqlarını yerinə yetirən icra başçısı Taleh Qaraşovun müstəsna xidmətləri vardır. İcra başçısı Taleh Qaraşov 44 günlük Vətən müharibəsindən bu günədək şəhid olmuş övladlarımızın istər dəfnində və istərsə də onların anım günlərində, şəhid bulaqlarının açılışlarında həmişə valideynlərin yanında olmuş, onlardan öz diqqət və qayğısını əsirgəməmişdir. Bir şəhid ailəsi ondan narazı qala bilməz. Bütün bunları fasebook səhifələrində də əyani şəkildə görmək mümkündür. Bizim Liman şəhərində, Şirinsu qəsəbəsində və Qumbaşı kəndində şəhidlərin məzarlarının ziyarət edilməsi ilboyu davam edir. Lənkəranın infrastrukturu günbəgün inkişafdadır. Qala və onun ətrafı müasir marketlərlə, yaraşıqlı reklamlarla göz oxşayır. Bu yüksəliş rayon miqyasında da davam edir. Hamı üçün yaxşı olmaq çox çətin məsələdir. Görülmüş gözəl işləri qiymətləndirməyənlər də vardır. Bu adamlar görülən işlərə laqeydcəsinə baxır, əl- ayağa dolaşır, yaxşı işlərin gedişatına mane olmağa, əngəl törətməyə çalışırlar. Taleh müəllim mənim yaşadığım Liman şəhərində bir sıra əhəmiyyətli küçələri asfaltlaşdırmış, sonrakı illərdə şəhərin digər küçələrini də asfaltlaşdırmışdır. Bu gözəl işlər yenə də davam etdiriləcək və bu sahədə şəhərin problemləri daha olmayacaq. Limanlılar başa düşməlidirlər ki, 70 il ərzində rayonun rəhbərlərinin heç biri-nə raykom katibləri, nə də İcra başçıları bu vaxtadək, yəni Taleh Qaraşova qədər bir küçəmizi belə asfaltlaşdırmamışdı. İndi baxın və görün ki, küçələrimiz necə abadlaşdırılıb. Bunlar yaxşı işlərdir! Özü də ən gözəl işlərdir, yadda qalan, özündən sonra iz qoyan işlərdir. Yoxsa ki, limanlıların həm yay, həm də qış bazarını söküb bu boyda şəhəri bazarsız qoyan keçmiş rəhbər işçi haqqında hansı müsbət sözü söyləmək olar?! Axı o gözəl və müasir tipli bazarı ərsəyə gətirmək üçün şəxsən mən neçə-neçə təşkilatın qapısını açmışdım. Çox çətinliklə onu tikdirmişdik. Bu insafsızlığa nə deyəsən?! Pis işlər də, yaxşı işlər də yadda qalır. Əlbəttə, rayondakı gözəl işləri, sıçrayışları, dinamik inkişafı görməyənlər və hətta dodaq büzənlər də var. Gərək ədalətli olasan ki, Lənkərandakı dinamik inkişafı, sıçrayışı görəsən! Gərək gözlərin kor ola ki, rayonun nailiyyətlərini görə bilməyəsən! Gərək dilin lal ola ki, bu qədər yüksəlişi görüb bu gözəlliklərdən bilərəkdən danışmayasan! Gərək qulaqların kar ola ki. Lənkəran haqqında söylənilən xoş sözləri eşitməyəsən! İndi anarxiya, mənəm-mənəmlik dövrü deyil. Bu xülya ilə yaşayanları təmiz düşüncəli insanlar çoxdan ram edilməsi mümkün olmayan sərt küləklərin ixtiyarına veriblər.

İndi respublikanın qədirbilən, Vətən daşı olan insanları Qalib Prezidentimiz İlham Əliyevin ətrafında bir yumruq kimi birləşərək, ona bütün işlərində dəstək olmaq üçün çalışır, hər yerdə onun ideyalarına sadiq olduqlarını bildirirlər. Lənkəranlılar hər açılan nurlu səhəri xoş niyyətlə qarşılayırlar. Onlar görülən hər bir yaxşı işə real qiymət verməyi bacaranlardır. Yuxarıda dedim ki, hamı tərəfindən sevilmək çətin məsələdir. Ola bilsin ki. oxucu ilə mənim fikirlərim də üst-üstə düşməsin. Hətta yazıma dodaq büzənlər də ola bilər. Bu, onların öz işləridir. Bəli, mən İcra başçısından yazmışam. Həyatını, ömrünün böyük bir hissəsini insanlara diqqət və qayğı göstərməklə əridən, onların sosial ədalətsizliyinə qarşı mübariz bir keşikçi olan, vətənpərvər, yaradıcı, təfəkkür fondu zəngin olan bir ziyalıdan yazmışam. Bu yazdıqlarımın gerçək həyatımızda öz həqiqi qiymətini məhz mən, əziz oxucum, sən verəcəksən. İcra başçısı Taleh Qaraşovun o zamanlar işlədiyi 3 il ərzində gördüyü gözəl işləri 2015-ci ildə “Dünya xatirəylə girib yuxuma...” adlı tarixi, etnoqrafik, iqtisadi, sosioloji, elmi-bədii kitabımda 30 səhifə həcmində düşüncələrimi yazmış, görülən yaxşı işləri foto-şəkillərlə reallaşdırmışam. Maraqlananlar görərlər ki, orada yazılanlar da, görülən işləri əks etdirən foto şəkillər də İcra başçısı Taleh Qaraşovun Lənkəran və lənkəranlılar üçün gördüyü yaxşı işlərindən bəhs edir. Bütün bunlar isə real gerçəkliklərdir. Əziz oxucum, odur ki, Lənkərana qonaq gəlin. Gəlin və baxın görün ki, bu gün Lənkəran necə cənnətməkandır. O zaman mənim yazdıqlarıma qətiyyən şübhəniz qalmayacaq.