Ağalar İdrisoğlu

Təxminən beş yüz minə yaxın əhalisi olan Sumqayıtın ilk peşəkar dramaturqu, ilk teatr rejissoru, Moskvada A.V. Lunaçarski adına Dövlət Teatr Akademiyasında rejissorluq təhsili almış, 140-dan çox tamaşaya quruluş vermiş, 15 pyesin, 7 romanın, 10 povestin, 150-dən çox hekayənin, novellanın, pritçanın, 1500-dən çox məqalənin, oçerkin, ressenziyanın, publisistik yazıların müəllifi, şəhərin ilk Əməkdar incəsənət xadimi, SSRİ dramaturqlarının laureatı, “Qızıl Dərviş”, Osman Mirzəyev adına respublika səviyyəli mükafatların sahibi, 1980-ci ildə rəhbərlik elədiyi Sumqayıt Gənclər Xalq Teatrı ilə Feyruz Məmmədovun “Bir bayarq altında” teatrlaşdırılmış tamaşası ilə Mokvadakı çıxışları zamanı SSRİ Xalq Təsərrüfatı Nailiyyətləri Sərgisinin Qızıl medalını Sumqayıta gətirən, on il Hüseyn Ərəblinski adına Sumqayıt Dövlət Musiqili-Dram Teatrının ilk və son bədii rəhbəri və direktoru işləmiş, Azərbaycan Dövlət Gənc Tamaşaçılar Teatrının quruluşçu rejissoru, Azərbaycan Yazıçılar və Jurnalistlər Birliklərinin üzvü, Azərbaycan Teatr Xadimlər İttifaqının yeddi il katibi olmuş, bu İttifaqın 44 ildir ki, üzvü olan, iyirmidən çox bədii, sənədli, publisist kitabların müəllifi Ağalar İdrisoğlu 1998-ci ildən fəaliyyətə başlayan, respublika səviyyəli, ən aparıcı nəşrlərdən biri - “Azad Azərbaycan” qəzetinin və eyni adlı saytın rəhbəri təyin olunub.

Böyük ziyalı 1976-cı ildən taleyini Sumqayıtla bağlayıb. Bu şəhərdə ədəbiyyatın, incəsənətin və jurnalstikanın inkişafına böyük əmək sərf eləyib. O, Sumqayıt və sumqayıtlılar haqda yüzlərlə məqalənin, oçerkin, publisistik yazının müəllifidir. Onun bu şəhər və onun insanlarıyla bağlı üç kitabı işıq üzü görüb. İnanırıq ki, Ağalar İdrisoğlu yeni iş fəaliyyətininin əsasını bir daha doğma Sumqayıta həsr edəcəkdir . Burada yaşayan qurucu, zəhmətkeş insanlar, onların gördüyü böyük abadlıq işləri haqqında yazıları geniş oxucu kütləsinin ixtiyarına verəcəkdir. Çünki o, bu şəhərlə nəfəs alır.Əsl cəfakeş insan əbəs yerə qeyd etmir ki, “Sumqayıt minlərlə insan kimi mənim də tale şəhərimdir. Bu şəhərin və insanlarının həyatı haqqında yazdıqca çox sevinirəm, qürur duyuram. Əminəm ki, Sumqayıt tezliklə dünyanın ən aparıcı, ən gözəl, ən baxımlı şəhərlərindən biri olacaq. Buraya çoxlu turist gələcək. O günlər heç də uzaqda deyil. Hazırda əksər insan Bakıda evlərini satıb, bu yaraşıqlı şəhərimizə sakin kimi köçür. Həmçinin xarici ölklərdən də axın edib, burada məskunlaşmaq qərarına gələnlər də vardır. Əlbəttə, bununla yalnız fərəhlənmək olar”. Biz də öz növbəmizdə dəyərli ziyalı Ağalar İdrisoğlunu yeni vəzifəyə təyinatı münasibətilə təbrik edir, ona yaradıcılıq fəaliyyətində daha böyük uğurlar arzulayırıq! Hörmətli Ağalar İdrisoğlu! Siz çox zəhmətkeş və məsuliyyətli şəxssiniz. Bütün uğurlarınızı fitri istedadınız, dərin savadınız, səbriniz və böyük səyiniz nəticəsində əldə etmisiniz. Hər zaman məhsuldar çalışmısınız. Və bundan da hədsiz zövq almısınız, mənəvi rahatlıq tapmısınız. Dahilərimizin gözəl kəlamını yada salmaq istəyirəm: “ Böyük səbri, inamı, iti ağlı, bacarığı, savadı, zəhmətilə ucalanlar həmişə o zirvədə qala bilir və xalqın sevimlisi olurlar”. Bu məqsədlə Siz də yaradcılığınızdan ilhamlanıb yüksəlmisiniz, ürəklərə yol tapmağı bacarmısınız!

İlhamə MƏHƏMMƏDQIZI,
Azərbaycan Yazıçılar
və Jurnalistlər Birliklərinin üzvü,
“Sumqayıt” qəzetinin əməkdaşı