Keçmişi, bu günü, gələcəkləri,

Alıb kitab kimi varaqlayırsan.

Otuz yeddi yaşın astanasında

Ötən gəncliyini soraqlayırsan.

Daha əvvəlkilər köçür yadından,

Çıxırsan cilvəli o gənc qadından,

Keçib sevgi adlı ürək odundan,

Xatirə ocağı qalaqlayırsan.

Uçur bahar gələn könül quşları,

Ömür sarayının düşür daşları,

Silib öz gözündən gələn yaşları,

Səndən umanlara gün ağlayırsan.

Otuz yeddi yaşın astanasında,

Daha nə qalır ki, qırxa deyirsən.

Əlində qalana şükür eləyib,

Köks ötürüb lənət, yoxa deyirsən...