...dünənin gülüşündə dodaqları xatirədir günəşin - ŞEİR

             Cavid Fərzəli

****

Evimizə payız gələndə 

Ayağı saralır divarların 

Adamlar evlərinə bənzəyir 

Alçaboylu, çinarsifətli.

 Evimizin qabağında alça ağacı

 ayrılıqdan quruyur. 

Gözü tökülür çiçəklərinin, 

Üzü qaralır yarpaqlarının. 

Uşaqkən daş atdığımız 

Pəncərələrin ürəyin 

sındırdığımız üçün 

İndi yağışların ürəyi

 yanmır çətirimizə.

 Getsəm bu evdən, 

Addımları balacalaşar göy üzünün, 

Əlləri düşər beşikdən buludların. 

Əllərimiz bahar gətirəndə 

Çiçəklər günəşdən doğma olar

 itaətkar küçələrə. 

Ancaq günəş köhnəlməz 

ağacların dilində. 

Çünki dünənin gülüşündə 

dodaqları xatirədir günəşin. 

Manevr.az