Son 30 ildən bəri doğma yurd-yuvasından,-Cəbrayıl rayonunun Böyük Mərcanlı kəndindən ayrı düşən şair-publisist, Azərbaycan Yazıçılar Birliyi Mingəçevir bölməsinin sədri İsmayıl İmanzadə 1980-ci ildən indiyə kimi xeyli sayda nəşr olunan kitablarının sevincini yaşayıb. Bu ilin iyul ayında onun iki şeir kitabı da işıq üzü görüb. Şairin “Qanun” nəşriyyatında nəşr edilən “Ömür muncuq düzümüdür” adlı yeni kitabında son illərdə yazdığı 109 şeiri və “Şuşa etüdləri” adlı poeması yer alıb.
Kitabın redaktoru tanınmış qələm sahibi, “Kredo” qəzetinin baş redaktoru Əli Rza Xələfli, “Yarımçıq hekayənin 44-cü günü” adlı ön sözün müəllifi isə Azərbaycan Yazıçılar Birliyi Ağdaş bölməsinin sədri, şair-publisist Fəxrəddin Əsəddir.
“Ömür muncuq düzümüdür” kitabında sərgilənən şeirləri və 2021-ci ilin yayında Şuşada keçirilən Vaqif Poeziya Günlərində iştirak edəndən sonra qələmə aldığı zəfər sevincli poeması ilə şair, həmişə olduğu kimi bu dəfə də oxuculara nəcib hisslər, unudulmaz anlar aşılamağı özünə borc bilib. Vətən sevgisi, 44 günlük İkinci Qarabağ Müharibəsində qazanılan tarixi qələbə, ana təbiətin büllur saflığı və ülvü məhəbbət notları üstə köklənən şeirlər və poema oxucuları məmnun etmək baxımından yetərincə təsir gücünə sahibdir.

* * *
Şairin “Hər çəməndən bir çiçək” adlandırdığı kitabı isə heç şübhəsiz ki uşaqları və onların valideynlərini daha çox sevindirəcəkdir. Yeri gəlmişkən, uzun illərdən bəri uşaqlar üçün də bir-birindən dəyərli şeirlər yazan müəllifin, indiyə qədər ayrı-ayrı illərdə nəşr etdirdiyi kitablarından üçü,-“Bahar qönçələri”-(1997), “Payızda açan çiçək”-(2003) və “Mən atamın qızıyam”- (2014) uşaqlara yönəlik söz sovqatıdır. Bu şeirlərin bir qismi 2Azərbaycan pioneri”, “Tumurcuq” qəzetlərində, “Günəş”, “Göyərçin” “Bənövşə” ədəbi dərgilərində, onlayn mətbuatda, orta məktəb dərsliklərində, məktəbəqədər tərbiyə ocaqları üçün nəşr olunan müntəxəbatda, uşaq şeirləri antalogiyasında və s. dərc olunub.

Şairin balaca oxucular üçün qələmə aldığı şeirlərdən beşinə,- “Kəpənək”, “Çoban”, “Günəbaxan”, “Mən atamın qızıyam” və “Çəpiş”ə gənc bəstəkar Əfsunə Rəhbərqızı tərəfindən mahnı ömrü bəxş edilib. Müəllifin 94 şeirinin yer aldığı kəpənək qanadları boyda kitabı Bakı şəhərindəki “Yeni Paliqrafist” MMC nəşriyyatı tərəfindən çap edilmişdir. Kitab Mingəçevir Dövlət Universitetinin dosenti Flora Namazovanın redaktorluğu və filologiya üzrə fəlsəfə doktoru, tanınmış alim-şairə Adilə Nəzərovanın (Adilə Nəzər) xeyir-dualarıya, - “İsmayıl İmanzadənin uşaq şeirlərindən ibarət “Hər çəməndən bir çiçək” kitabına ön söz”lə oxuculara təqdim edilir...
Hər iki kitab ümumən, ömrünün müdrik çağlarını yaşayan şair İsmayıl İmanzadənin oxuculara layiqli söz töhfəsi, ədəbi ictimaiyyət qarşısında qarşısında poetik hesabatıdır. Sonda doğma ata elinə 30 illik ayrılıqdan sonra yenidən qayıtmaq arzusu ilə yaşayan şairə uğurlar arzulayırıq! Ulu dədələrimiz demişkən,- Ömür bitsə də, yol bitməz!

Manevr.az