.png)
Xəbər lenti
"Başımızı girləyirik, nə gedir vaxtdan gedir" - Təranə Dəmirdən şeirlər
Təranə Dəmir***
Görəsən kimin dərdidi
Yapışıb yaxamızdan.
Göydən neçə alma düşə
Çıxmırıq yuxumuzdan.
Başımızı girləyirik,
Nə gedir vaxtdan gedir.
Dünya da vurub çıxmağa
Əldən, ayaqdan gedir.
Gözümüzə baxa-baxa
Gözümüzü oyurlar.
Üzümüzə gülə-gülə
Dərimizi soyurlar.
Daşı nə yaman ağırmış,
Həqiqətin, İlahi.
Gözləyirik haqqa dəyə,
O da çətin, İlahi.
***
Heç bilmədim kimə verdim baharı,
Hansı gözün qarasında itirdim.
Heç bilmədim hansı gülün üzündə,
Hansı şeirin arasında itirdim.
Bir də gördüm gözlərimdən qış baxır,
Yerişim də, duruşum da qış adam.
Yazda payız, payızda qış ümiddi,
İndi görək nə gələcək qarşıdan?
Ha sevgidən,ha həsrətdən yazım mən,
Kim baxar ki,ürəyimin rənginə?
Ümidimi sabahıma saxlayım,
Sonrasını Tanrı bilər, mən kiməm.
***
Bir ömür dalınca düşdüm,
Bir ömür gəzdim səni.
Gəzdim bəyazda, qarada,
Çağırdım, susdum səni.
Axtardım dağın başında,
Çölün düzündə gəzdim.
Ulduzların arasında,
Göyün üzündə gəzdim.
Bilmədim boyun neçədi,
Dadın necə, bilmədim.
Səni gəzə-gəzə ömrü
Verdim heçə, bilmədim.
...Harda qaçıb gizlənmisən?
Bir işığa çıx görüm.
Ədalətsən, həqiqətsən-
-Hərnəsənsə qalx görüm.
Sən qələmin məhəbbətdən
Küsən çağında gəldin.
Xəzəllərin dağda,daşda
Gəzən çağında gəldin.
Elə gəldin, heç bilmədim
Payız nədi, qış nədi.
Mənim qəlbim elə bircə
Məhəbbətə təşnədi.
İlin,günün bu vaxtında
Kimim vardı sevəsi?
Harda idin bu çağacan,
Ay könlümün yiyəsi.
***
Anasın itirən uşaqlar kimi,
Ayrılıq gətirən uzaqlar kimi,
Evinə tələsən qonaqlar kimi
Darıxıram.
Səhərə sürünən gecələrsayaq,
Zülmətə bürünən küçələrsayaq,
Bir gözüm yuxulu, bir gözüm oyaq,
Darıxıram.
Ümidim bir kibrit çöpü boydadı,
Həsrətim pəncərə, qapı boydadı,
Azadlıq boynumun ipi boydadı,
Darıxıram.
***
Bu dünya sənin əsərin,
Göy də sənin,Yer də sənin.
Cəhənnəm də,gor da sənin,
İlahi!
Toplayan da, çıxan da sən,
Dağıdan da, yığan da sən,
Uzaq da sən, yaxın da sən,
İlahi!
İblis səndə, mələk səndə,
Qəbir səndə, bələk səndə,
İnsafa gəl görək sən də,
İlahi!
Az yırğalan taxtda görək,
Bir az dayan, toxta görək,
Qürrələnmə çox da görək,
İlahi!
Nə tökürsən yer dənləyir,
Gah sulayır gah yemləyir,
Nəfəsin ölüm dəmləyir,
İlahi!
Bu dünya sənin əsərin,
Göy də sənin, Yer də sənin,
Günahınıq burda sənin,
İlahi!
Manevr.az
Xəbəri paylaş
Çox oxunanlar
Son yüklənənlər
Axtarış
Reklam
İqtisadiyyat
Ədəbiyyat
Kriminal
Şou-biznes
Yazarlar
Emil Rasimoğlu
Sevinc QƏRİB
KƏRAMƏT
KƏRAMƏT
Emil Rasimoğlu
KƏRAMƏT
Sorğu
Portalımızı dəyərləndirin.
Çox oxunanlar