Xuraman İsmayıl qızı Muradova

(yeni şeirlər)

Ayasofiyam… Ayasofiyam…

Allahu Akbər, deyirəm,
Ruk edib səcdə edirəm
Sənin ücün dua edirəm,
Üzərinə olsun Salam
Ayasofiyam, Ayasofiyam…

Peyğəmbərimin nur üzü,
Fatehi Mehmetin özü,
Sən ruhumun görən gözü,
Gönlüm səndən alar ilham
Ayasofiyam, Ayasofiyam…

Hardan baxsam görrəm səni,
Sən eyy dünyanın gözəli
Hüriiyyətimin əzəli,
Sən Rabbimizden bir nişan
Ayasofiyam, Ayasofiyam.

Toprağında səcdə izi,
Tariximin ulus izi,
Nəfəsində rəhmət sözü
Sən eyy ürəklərdə qalan
Ayasofiyam… Ayasofiyam…

Uca səs gəlir göylərdən,
Dəstə dəstə mələklərdən,
Aləmlərin tək Rəbbindən,
Üzərinə olsun, Salam
Ayasofiyam, Ayasofiyam.

Bu şeri söylər Xuraman,
Dualarım senle her an,
Can Azərbaycandan salam
Canım olsun sana qurban,
Ayasofiyam Ayasofiyam…

YAŞAMAQ İSTƏRSƏN...

Yaşadığın bir gün ömrə dəyərsə
Bir günlə həyatın əgər dönərsə...
Taleyin üzünə nə vaxtsa gülərsə,
Xəyyalların sənə qonaq gələrsə.
Yaşamaq istərsən...

Kədərin əlindən inciyib, küsüb,
Arzuna nə vaxtsa çata bilərsən..
Qaçıb arzuların şirin üzünə,
Onun əllərindən tuta bilərsən.
Yaşamaq istərsən...

Bəzən lal olarsan, bəzən susarsan,
Bəzən ümman kimi dolub daşarsan.
Ürəyin darıxar, ruhun sıxılar,
Bəzən dəniz kimi elə coşarsan..
Yaşamaq istərsən…

Bir ömür əbədi xəyal qurarsan,
Xəyallar içində xöşbəxt yaşarsan,
Həyatı beləcə təsəvvür edib,
Özün-öz dünyana hey vurularsan.
Yaşamaq istərsən...

ÇALIŞ

Kimsənin qəlbinə dəymə, toxunma,
Dəysən də o könlü almağa çalış.
Dostların gözündə mərd ol, uca ol,
Daima ucada qalmağa çalış.

Boş vədlərə uyub boşuna yanma,
Doğrunu doğru de, sözünü danma,
Özünü heç zaman ucada sanma,
Qəlblərdə bir körpü salmağa çalış.

İstisi bir olmur alovun, hisin,
Qəlbində kövrəklik vardır hər kəsin,
Verıb qiymətini yaxşının, pisin.
Könüllər sultanı olmağa çalış.

İnsanda nəfs var heç zaman doymaz,
Allahı sevənlər şeytana uymaz,
Qəlbi daş olanlar sevgini duymaz,
Arabir xəyala dalmağa çalış.

Hər gözün görənə eyləmə həvəs,
Çalış sadə dolan, sadə danış, gəz,
Bu dünya malına meyl etmə əbəs,
Haqq adlı bir izi qoymağa çalış..

SƏNİ YAŞADACAM

Səni məndən alıb aparan yollar.
Mənə qaytaracaq, bilirdim bunu.
Yenə gələcəksən sən həyatıma..
Yenə olacaqsan ömrümün nuru.

Sənin xəyalınla tutub əl-ələ,
Gedəcəm səninlə bir sevgi yolu.
Səni aparacam dünyama hələ,
Səni yaşadacam bir ömür boyu.

O elə dünya ki, elə dünya ki,
Orda verməyəssən yalan vədləri.
Xəyaləndə olsam orda səninlə,
Vurub keçəcəyəm bütün sədləri.

Qayğılı, qayğısız ömür yaşayıb,
Quracam səninlə gözəl bir aləm.
Bu dünya dərdini unutmaq üçün
Son anda biləcəm mən tək deyiləm.

BÜTÜN QADINLARIMIZA

Qadınlar həssasdır, qadınlar kövrək.
Qadınlar daşıyır zərif bir ürək.
Kişilər, qırmayın qadın qəlbini!
Yollara baxmasın o gözlər ürkək.

Qadınla davranmaq bir incəlikdir,
Qadinlar sevimli incə çiçəkdir.
Onların qədrini bilmək gərəkdir,
Qadın yer üzünə gələn mələkdir.

Qadın qız övladı…Qadın anadır,
Övladın sevgisi böyük dəryadır.
ANAnın övlada olan sevgisi,
Sonu görünməyən bir asimandır…

DARIXMAQ

Darıxmağın rəngi olmur, əzizim,
Darıxmaq şeh düşən gülə bənzəyir.
Yandırar qəlbini gözə görünməz.
Ocağında sönmüş külə bənzəyir.

İnsana ayrılmaz bir yoldaş olar,
Sığınar dərdinlə bir sirdaş olar,
Darıxmaq qəlbində dərin iz salar.
Tufanla sovrulan yelə bənzəyir.

Çox dayaz görsənər,amma dərindi,
Həsrəti ömürlük qəlbdə yerindi,
Üşüyər hər zaman, yeri sərindi,
Darıxmaq bir çaya,gölə bənzəyir.

Yaralar adamı öz can evindən,
Əridər, məhv edər,saça salar dən,
Susarsan,ürəyin dolar kədərdən.
Darıxmaq lal olmuş dilə bənzəyir.

Eyləyər qəlbinilap oyuq-oyuq,
Hərdən qaynar olar,hərdən də soyuq,
Eyləməz özünü heç nəyə layiq
Darıxmaq, səhraya,çölə bənzəyir.

YAZ, DƏRDİMİ

Yaz notlara dərdimi,
Mənə ümid bəstələ...
Dərdlərimə nəfəs ver,
Nəğmələrində səslə...

Küsən xəyallarımın
Saclarından as məni.
Soyuğunda azdığım
Həsrətinlə kəs məni.

Gecənin yaxasından
Asılan ulduz kimi.
Qaranlıqlar içində
Susmuşam yalqız kimi.

Dərdimin tumarı var
Yağan yağışlarında.
Həsrətim buz bağlayıb
Donan baxışlarında.

Dərdimin notlarını
Heç kəsə vermə, saxla.
Bu, bir ömür sirrimdi,
Darıxsan oxu, ağla.

SƏNDƏN ELƏ KÜSƏRƏM

Mən elə küsərəm səndən, əzizim,
Bir daha üzümü görə bilməzsən.
Mən elə küsərəm səndən əzizim,
İstəsən də geri dönə bilməzsən.

Sənə olan sevgim sonsuz olsa da,
Danışa bilməzsən, dinə bilməzsən.
Yanarsan qəlbində sən için- için,
Dərdini kimsəylə bölə bilməzsən.

Mən elə küsərəm səndən əzizim,
Durnalar ağlayar göyün üzündə.
Gözü yaşlı qalan bu sevdamızın,
Zülmətə çevrilər dünya gözündə.

Son payızda əsənsoyuq küləklər,
Aparar sevgimi cox uzaqlara.
Fikrin bir nöqtədə ilişib qalar,
Gözlərin tikilər uzaq yollara.

Mən elə küsərəm səndən əzizim,
Bulud tək hönkürər sevda yağışın.
Qalarsan hicranın ümidlərində,
Dikilər yollara həsrət baxışın.

Gözün aydın, ay Vətən

44 günlük müharibə
Sənə zəfər gətirdi.
Qol açdığın oğullar
Özün sənə yetirdi
Gözün aydın, ay Vətən!

30 illik həsrəti
Gözlərindən sildilər.
Məğlub adlı ləkəni
Səndən təmizlədilər
Gözün aydın, ay Vətən!

Cəsarətin, qüdrətin
Dilə gəlmişdi bir an.
Bu hünərin önündə
Sanki donmuşdu zaman.
Gözün aydın, ay Vətən!

VƏTƏN, AY Vətən

Səni sevən ürəyim
Hər an sənlə döyünür.
Sən mənim eşq məbədim,
Mənim könül dünyamsan,
Sən bu vətən dünyamda
Sən mənim öz anamsan.
Vətən, ay vətən!

Başı bəlalar çəkən
Qanlı bir keçmişin var.
Neçə yerə bölünüb
Parçalandın min dəfə
Amma, heç sarsılmadın.
Haqq-ədalət yolunda.
Yazıldı zəfər adın.
Vətən, ay vətən!

Azadlığın eşqiylə
Yanan odlu ürəyin
Mətinləşdi, bərkidi
Mübarizə yolundan
Çəkinmədin heç zaman
Tarix-tarix yaşadın,
Zirvə-zirvə ucaldın
Vətən, ay vətən!

Sorağısan səsimin
Ərşə qalxan ünündə.
Çiçək-çiçək dil açdın
Həqiqətin önündə.
Qərinələr içində
Neçə min il tarixin,
Silinməyən yaddaşın.
Özün boyda dərd daşın,
Vətən, ay vətən!

Dünən igid yaraqlım,
Bu gün zəfər soraqlım,
Dirilən ümidlərim,
Açılan kilidlərim
Sənin zəfər adındı!
Azadlıq adlı səsim,
Şirin ana nəfəsim
Vətən, vətən, ay vətən!!

Azərbaycan-Türkiyə

Əzəldən bir doğulub
Birgə boy atmısınız,
Adı, ruhu, qanı, bir,
Kökü, soyu, canı bir,
Siz doğma qardaşınız
İşıqlı gələcəyə
Azərbaycan-Türkiyə!

Tarix boyu bir olub
Yolunuz, məqsədiniz.
Dünyaya car çəkibdi
Türk adlı haqq səsiniz,
Sizin bu varlığınız
Bölünməzdir ikiyə
Azərbaycan-Türkiyə!

Baş əyməz türk övladı
Düşməninə, yadına.
Sadiq olub hər zaman
Özünün türk adına.
Layiqdir ərənliyə,
Layiqdir hər sevgiyə,
Azərbaycan-Türkiyə!

Daşınızda doğmalıq,
Sözünüzdə qürur var.
Yenilməz vüqarınız
Düşmənin bağrın yarar.
Siz ey doğma şahinlər,
Turana gedən yolun
Göyərən ümidləri
Sülhün göyərçinləri!
Nə mutlum Türküm deyə
Azərbaycan-Türkiyə!

İNDİ DƏYƏR VERƏK

Sevdiklərimizə indi dəyər verək.
İndi sarılaq...
Cünki ölüm gələcək.

Səssiz... Səmirsiz...
O hər an haqdır.
Zamanın ayrılıq əli əlimizdə,
Tez-tez qapımızı döyəcək.
Ayrılığın ogey baxışında
Tapa bilməyəcəyik
bir birimizi....
Əcəl gəlib aparanda
sevdiyimizi...
Yanacaq ürəyimiz
Parcalanacaq qəlbimiz,
Didərgin olacaq ruhumuz
O zaman anlayacağıq ki,
Bir metrə torpağın altı
Dünyanın o biri ucundan
Cox-cox uzaqdı.
Cox cox uzaqdı…..
Səcdənə gəlmişəm Şuşam
Həsrətdən üşüyən arzularımı,
Götürüb səcdənə gəlmişəm, Şuşam.
Neçə baharımı, neçə yazımı,
Sənsiz həyatımdan silmişəm, Şuşam.

Mərmi gülüşlərin göz dağım olub,
Hər damla göz yaşın bulağım olub,
Sənsiz kaş bilsəydin nə çağım olub,
Dərdinlə can verib ölmüşəm, Şuşam.

Anam tək sinəmə bağladım səni,
Hər gecə, hər gündüz qoxladım səni,
Otuz il ürəkdən ağladım səni,
Otuz il ürəksiz gülmüşəm, Şuşam.

Qarlı dağlarına çökən duman-çən,
Mənim ürəyimə çökmüşdü nədən,
Ruhumu özüylə aparıb gedən,
Dünyanı öz dünyam bilmişəm, Şuşam.

Olub keçənləri unudaq daha,
Bağışla, deyəsən batdım günaha,
Bilsəydin açılan bu xoş sabaha,
Nə qədər qurbanlar kəsmişəm,Şuşam.

Xoşdur azadlığın, xoşdur bu sədan,
Səni gözlərimdə yaşatdım hər an,
Səcdənə durubdur qızın Xuraman,
Səni candan artıq sevmişəm, Şuşam.