Qərb qorxu içində: “Avropa iki ay qazsız qala bilər”

Avropa güclü şaxta və yanacaq çatışmazlığı səbəbindən iki ay ərzində qazsız qala bilər.
Manevr.az konkret.az-a istinadla xəbər verir ki, bu barədə “Bloomberg” nəşri məlumat yayıb:
“Güclü şaxta və anbarlarda mavi yanacağın az olması səbəbindən yaxın iki ayda qazsız qalma riski var. Ötən il Avropa ölkələrində külək və günəş enerjisinin qeyri-sabitliyi səbəbindən elektrik enerjisi istehsalı aşağı düşüb. Qarşıda qışın ən soyuq iki ayı var və Avropanın qazsız qala biləcəyi ilə bağlı qorxular mövcuddur” – deyə nəşr yazıb.
“Wood Mackenzie” konsaltinq şirkətinin vitse-prezidenti Massimo Di Odoardo isə bildirib ki, “Şimal axını 2” və ya mövcud marşrutlar vasitəsilə Rusiyadan əlavə tədarüklər olmadan anbarlardakı qaz ehtiyatlarını tələb olunan səviyyəyə çatdırmaq mümkün deyil.
Həm hava amili, həm də “Şimal axını 2”nin işə salınmaması vəziyyəti xeyli qəlizləşdirib. “Şimal axını 2” kəmərinin hər iki xətti texniki qazla doldurulub və istismara hazırdır. Lakin gözlənildiyi kimi, ilin ikinci yarısına qədər istismara verilməyəcək.