Sirr deyil ki, müasir dövrün ən geniş yayılmış qüsurlarından biri də qidaya qarşı acgözlükdür. Elə yaxın çevrəmizdə də həddən artıq qida qəbul edən, bir oturuma 3-4 nəfərin yeməyini yeyən adamlar var. Bu barədə nağıl və dastanlarda da kifayət qədər personajlar, məlumatlar var. Bir dəfəyə bir qoyunu yeyənlər, bir oturuma bir pud (16 kq) düyünün plovunu yeyənlər barədə nağıl, dastan, əsatirlər kifayət qədərdir. Amma bunlardan heç biri 18-ci əsrin sonu, 19-cu əsrin əvvəllərində yaşamış Şarlem Domeri ilə bəhsə girə bilməz.

Manevr.az dünyanın ən qarınqulu adamı Şarlemin həyatını təqdim edir.

Şarlem çox nadir rast gəlinən polifagiya xəstəliyinə düçar olmuşdu. O, daim yemək arzulayır və hər dəfə də həddən artıq çox qida qəbul edirdi. Maraqlısı odur ki, bu qədər yemək yesə də, artıq çəkidən əziyyət çəkmirdi.

Şarlem polyak köklü ailədən çıxmışdı. Onun ailəsi böyük idi. Bu səbəbdən uşaq vaxtından daim ac olan oğlanı doydura bilmirdilər.
Heç vaxt yeməkdən doya bilməyən Şarlem 13 yaşı olanda Prussiya ordusuna daxil oldu. Sonradan isə, Fransanın inqilab ordusunun sıralarına qoşuldu və Şarl Domeri adını götürdü.

Domerinin nə dərəcədə acgöz olduğunu anlamaq üçün bir neçə faktı sıralamaq mümkündür:

- Fransa ordusunun sıralarında olduğu zaman 174 pişik tutub və yeyib. Bu faktı dövrün tarixi mənbələri qeyd edib. Yeməyə başlamazdan əvvəl Şarl pişikləri öldürürdü. Bəzən isə o qədər ac olurdu ki, pişikləri elə diri-diri yeyirdi.

- Əsasən ət yeməklərinə üstünlük verən qarınqulu ət tapmayanda 2-3 kilo ot yeyirdi. Ot da tapa bilməyəndə dayanmadan siqaret çəkirdi.

- Fransa hərbi-dəniz desantlarını İrlandiyaya aparan gəmidə qəribə hadisə baş verir. Döyüş zamanı top gülləsi matroslardan birinin ayağını qoparır. Domeri qopmuş ayağı qaparaq yeməyə başlayır. Ekipajın bir üzvü zorla insan ayağını onun əlindən alaraq suya atır.

- 1799-cu ilin fevral ayında Domerinin də göyərtəsində olduğu gəmi düşmənlər tərəfindən qəsb edilir və gəmi heyəti hərbi əsirlər üçün nəzərdə tutulmuş Liverpul düşərgəsinə göndərilir.

- Düşərgədə Domeri iştahı ilə rəhbərliyi dəhşətə gətirir. Ona digər əsirlərə nisbətən on dəfə çox yemək versələr də, Şarl daim aclıqdan şikayətlənirdi.
O dövr üçün bir fransız əsirinin standart qida rasionu- 740 qram çörək, 230 qram tərəvəz, 57 qram yağ və 170 qram pendir idi. Bu rəqəmi 10-a vurun.

- Yeməkdən doymayan Şarl həbsxana siçovulları və pişiklərini də həzm-rabedən keçirməyə başladı.

- Domerinin acgözlüyü barədə xəbər çox yerdə duyulur. O, bu məlumatı yoxlamaq üçün gələn xüsusi tibbi komissiyanın qarşısında 7.3 kilo çiy mal əti, 1 kilo sala yeyir və üstündən də 4 şüşə çaxır içir.

Həkimlər uzun yoxlamalardan sonra qərara gəlirlər ki, Şarl tamamilə sağlamdır. Həkimləri şübhəyə salan yeganə fakt isə o idi ki, Şarl yemək və yuxu vaxtı daim tərləyirdi.

Müasir tibbdə isə hələ də polifagiya xəstəliyinə düçar olan adam qeydə alınmayıb.Ölkə.Az