"Mercedes"in loqosunu istehsal edən şirkət müflis oldu

“Mercedes-Benz” avtomobilləri üçün üçbucaqlı ulduz nişanları istehsalı ilə tanınan alman plastik istehsalçısı “Gerhardi Kunststofftechnik GmbH” müflis olduğunu elan edib.
Xarici KİV bildirir ki, şirkət bu qərarı artan xərclər və tələbatın azalması səbəbindən verib. Eyni zamanda, onun 1500 işçisinin gələcəyi qeyri-müəyyən olaraq qalır.
“Gerhardi” sənayedəki böhrandan təsirlənən yeganə şirkət deyil. Bir çox avtomobil komponentləri istehsalçıları kimi, avtomobil istehsalçıları da istehsalın azaldılması səbəbindən uzun müddət ayaqda qalmaq üçün mübarizə aparır. Sonuncular isə öz növbəsində satışın aşağı olması və elektriklə işləyən avtomobillərə keçidlə bağlı çətinliklər nəticəsində belə tədbirlər görürlər.
“Gerhardi” şirkəti 1796-cı ildə metal məmulatların istehsalçısı kimi yaradılıb. 20-ci əsrdə o, “Mercedes-Benz Group AG” üçün barmaqlıqlar, tutacaqlar və xrom bəzəklərin əsas təchizatçısına çevrilib. Daha sonra marka Almaniyadan avtomobil istehsalçısına məhsul tədarükünü davam etdirərək plastik məhsulların istehsalına keçib.