Çinli milyarder hərracda 6,2 milyon dollara alınan bananı yedi

Çinli milyarder Castin Sun hərracda aldığı divara yapışdırılan bananı yeyib.
Manevr.az bildirir ki, qaynarinfo bu barədə "Barron's"a istinadən xəbər verir.

Qeyd edək ki, italyan rəssam Mauritsio Kattelanın "Komediyaçı" adlı konseptual sənət əsəri 6,2 milyon dollara satılıb. Onun alıcısı TRON kriptovalyuta platformasının yaradıcısı Castin Sun olub. 
Satın alındıqdan qısa müddət sonra Sun bananı "unikal bədii təcrübə"nin bir hissəsi kimi yemək niyyətini açıqlayıb və onun həm incəsənət dünyasında, həm də populyar mədəniyyətdə əhəmiyyətini vurğulayıb.
"Bu sözləri deyəcəyimi heç düşünməmişdim: banan üçün altı milyon dollar ödədim", deyə milyarder zarafat edib. 
Tezliklə milyarder verdiyi sözü yerinə yetirib və bananı divardan qopararaq yeyib.
"Komediyaçı" ilk dəfə 2019-cu ildə Mayami-Biçdəki Art Baseldə nümayiş etdirilib və burada tamaşaçılar arasında bunun əsl sənət, yoxsa sadəcə bir zarafat olması ilə bağlı müzakirələrə səbəb olub.
Castin Sun ilk pulunu "Snapchat"ın Çin ekvivalenti olan "Peiwo" tətbiqindən qazanan Çin əsilli sahibkardır. 2014-cü ildə o, kripto icmasının sıralarına qoşulub və həmin vaxtdan blokçeyn layihələrinə diqqət yetirib.