"O fikirlə razılaşıram ki, noyabrın 15-dək Rusiya oktyabrın 10-da olduğu kimi Ukraynaya daha bir neçə kütləvi, qanlı raket hücumu həyata keçirə bilər".

Manevr.az bildirir ki, bunu milli.az-a açıqlamasında Ukrayna Diplomatiya İnstitutunun mütəxəssisi, siyasi ekspert Nikolay Spiridonov deyib.

O bildirib ki, Rusiya Xersonu öz xoşluğu ilə tərk edə bilər:
"Rusiyanın müharibənin indiki mərhələsində əsas məqsədi dinc əhalini (mülki əhalini) qorxutmaq və Ukraynanı sülh danışıqlarına inandırmaqdır. Buna görə də ictimai infrastruktur və enerji sahəsinə kütləvi hücumlar edilir.Rusiyaya cəbhədə operativ pauza lazımdır, çünki hərbi imkanları tükənməyə doğru gedir. Ona görə də Kreml bu cür təhdid və şantajın köməyi ilə bu pauzanı əldə etməyə çalışır.

Bütün bunlara baxmayaraq payızın sonuna qədər Xersonun azad edilməsi çox ehtimal olunan bir ssenaridir. Rusiya tədricən işğal etdiyi torpaqları geri qaytarır. Logistika baxımından Xersonu təmin etmək çox çətindir. Rusiyanın nisbətən könüllü olaraq Xersondan çəkilməsi variantı da var, lakin bu istiqamətdə qanlı döyüşlər də istisna deyil.
Müharibə başlayandan bəri Ukraynaya edilən 41 milyard avro məbləğində hərbi yardımın davamı gələcək. Artıq daha çox ölkə kənarda sakit durmağın işə yaramayacağını anladığı üçün hərbi potensialını gücləndirir. Rusiyanın aqressiv hərəkətləri bütün sivil dünya üçün təhlükə yaradır".