Aprelin 28-də günorta saatlarında Rusiyanın Xarkov şəhərini atəşə tutması nəticəsində azı bir nəfər həlak olub, iki nəfər yaralanıb.
Manevr.az bildirir ki, bu haqda Xarkov Regional Hərbi Administrasiyasının rəhbəri Oleq Sinegubov Telegram-da yazıb.
"Yenə Xarkov vilayətində dinc əhali işğalçıların atəşindən əziyyət çəkir! Yarım saat əvvəl (təxminən saat 12:00-da - red.) ruslar Xarkovun şərq rayonlarından birinə zərbələr endiriblər. 2 nəfər yaralanıb. Təəssüf ki, 1 nəfər öldü".
Administrasiya rəhbərinin sözlərinə görə, Xarkov vilayətində ruslar mülki infrastruktura, kənd küçələrinə, meydanlara və hətta qəbiristanlıqlara atəş açır.
Zərbələr nəticəsində rayonun yaşayış məntəqələrindən birində bina uçub. İlkin məlumata görə, dağıntılar altından xilas edilənlərin xəsarətləri yüngüldür və xəstəxanaya yerləşdirilməyə ehtiyac yoxdur.
Saat 12:40-a olan məlumata görə, Xarkov vilayətində 4 nəfər yaralanıb, 1 nəfər ölüb. Zərərçəkənlər barədə məlumat dəqiqləşdirilir.
Sinegubov Xarkov sakinlərini həyəcan siqnallarına məhəl qoymağa və sığınacaqdan lazımsız yerə çıxmamağa çağırıb.