Türkiyədə dəhşətli zəlzələ nəticəsində çoxsaylı dağıntıların və insan tələfatının olması, on minlərlə ailənin evsiz-eşiksiz və maddi təminatsız qalması uzun illərdir məcburi köçkünlükdən əziyyət çəkən həmvətənlərimizi də dərindən kədərləndirib. Onlar da türkiyəli qardaş və bacılarımıza yardım göstərmək məqsədilə ölkəmizdə aparılan yardım kampaniyasına qoşulublar.

Respublikanın müxtəlif bölgələrində müvəqqəti məskunlaşmış məcburi köçkün icmaları  müstəqil şəkildə səfərbər olaraq bu kampaniyada iştirak edirlər. Zərərçəkənlərə göndərilməsi üçün yığılmış yorğan, döşək, digər müxtəlif yataq ləvazimatı və zəruri avadanlıqlar Bakı şəhərindəki Heydər Əliyev adına İdman Konsert Kompleksində yerləşən toplama məntəqəsinə təhvil verilib. 
Təbii fəlakətlər də məcburi köçkünlüyü yaradan əsas səbəblərdəndir. Ermənistanın işğalçılıq siyasəti nəticəsində Qarabağda və Şərqi Zəngəzurda ata-baba yurdunu, minbir əziyyətlə tikdiyi evi, heç bir əşya götürmədən, tərk etməyə məcbur qalan azərbaycanlı məcburi köçkünlər Türkiyədə  təbii fəlakətin yaratdığı məhrumiyyətləri yaxşı anlayır və bu hadisədən zərərçəkənlərə maddi dəstək göstərməyi öz mənəvi borcları hesab edirlər. Zəlzələ nəticəsində həlak olanlara Allahdan rəhmət, əzizlərinə səbr diləyir, yaralılara 
tezliklə şəfa tapmağı arzulayırlar.
Səninləyik, Türkiyə!