“Meymun çiçəyi” Azərbaycana gələ bilərmi? - baş infeksionistdən AÇIQLAMA

Böyük Britaniyada da iki yeni "Meymun çiçəyi” ştammı aşkar edilib. Ölkədə yoluxanların ümumi sayı isə 9-a çatıb. Bununla belə  mütəxəssislər, xəstəliyinin yayılma intensizliyinin elə də sürətli olmadığını bildirir.
Manevr.az xəbər verir ki, baş infeksionist Cəlal İsayevin sözlərinə görə, "meymun çiçəyi"  insanlar arasında adətən az və nadir görünən  xəstəlikdir.
"Bu xəstəlik ilk dəfə 1958-ci ildə Afrika ölkələrində  meymunlar arasında müşahidə edilib. Buna görə də  xəstəliyə "meymun çiçəyi” adı verilib. Sonradan bəlli olub ki,  xəstəlik insanlara da keçə bilir. Amma meymundan insana keçməsi halına çox az rast gəlinir. Bu xəstəliyə daha çox uşaqlar yoluxur. Öz fəsadlarına görə çiçək xəstəliyini xatırladır. Ölüm faizi koronavirusla müqayisədə bir qədər yüksəkdir. Çiçək xəstəliyinə qarşı immunitet qazanmış insanlar bu xəstəliyi daha yüngül keçirir",  -  İsayev bildirib.  Onun fikrincə, Avropa ölkələrində azsaylı yoluxmalar baş versə də, Azərbaycanda yayılması və pandemiya yaartması ehtimalı ilə bağlı dəqiq  proqnoz vermək çətindir. "Çünki, biz ilkin dönəmlərdə koronavirusun pandemiyaya çevriləcəyini dəqiq bilmirdik. Amma biz sonradan nə qədər insanın tələf olmasının şahidi olduq”, - İsayev bildirib.
"Meymun çiçəyi” nadir, lakin potensial təhlükəli infeksiyadır.  Virusun iki əsas ştammı var -  Qərbi Afrika və Mərkəzi Afrika. Simptomlarına görə, qripə bənzəyir və limfa düyünlərinin şişməsi ilə başlayır.  Daha sonra üzdə və bədəndə geniş yayılmış səpkilərə çevrilir. 1970-ci ildə on Afrika ölkəsində "meymun çiçəyi" epidemiyası qeydə alınıb. 
Afrika ölkələrindən sonra "Meymun çiçəyi” xəstəliyinə ilk dəfə 2003-cü ildə ABŞ-da rast gəlinib. Xəstəlik insanlara çöl itlərindən keçib və ümumilikdə 81 yoluxma halı qeydə alınıb./anews.az