Hüquqşünas: “Belə olan halda əsasən ailə daxilində çəkişmə olacaq, nəinki... ”
Sosial şəbəkələrdə yayılmış məlumatlara əsasən Əmircan bələdiyyəsinin sədri, YAP üzvü Rafael Cəfərov bələdiyyə seçkilərində ailə üzvlərindən və yaxın qohumlarından ibarət 8 namizəd irəli sürüb. Yəni potensial olaraq Əmircan bələdiyyəsinin yeni tərkibi ancaq Cəfərovun ailə üzvlərindən formalaşa, bir növ “ailə bələdiyyəsinə” çevrilə bilər.

Virtual.az-ın məlumatına görə, üçüncü Suraxanı seçki dairəsindən bələdiyyə üzvlüyünə namizəd kimi Rafael Cəfərov özü, onun qızı, oğlu, iki bacısı, iki qardaşı və iki yaxın qohumu qeydə alınıb. Yəni Rafael Cəfərov öz rəqiblərinə heç bir şans buraxmır.

Qeyd edək ki, tezliklə bələdiyyə seçkilərinin keçiriləcəyi bir ərəfədə bu məlumat həm sosial şəbəkələrdə, həm də mətbuatda geniş müzakirə obyektinə çevrilib. Əksəriyyət “ailə bələdiyyəsi”nin qanuna zidd olduğunu, bir ailədən bir neçə nəfərin namizədliyini irəli sürməsinin doğru olmadığını bildirib.

Məsələ ilə bağlı adıçəkilən bələdiyyənin sədri Rafael Cəfərov “YeniSabah”a açıqlamasında namizədliyini irəli sürənlərin hamısının qohumu olduğunu inkar edib: "Namizədliyini irəli sürənlərin yarısı başqa-başqa insanlardır. Sadəcə, soyadları mənimki ilə eynidir. Düzdür, mənim ailəmdən də namizəd olanlar var. Nə olsun? Burada nə var ki? Bu qanunidir, biz heç bir qanunu pozmamışıq. Sadəcə olaraq, namizədliyini verib, seçilməyib ki...

65 nəfər namizədin içərisində 4-5 nəfər bizim ailədən var. Namizəd olmaqda nə problem var axı? Sosial şəbəkələrdə yayılan siyahıda olanların yarısı heç bizim qohum deyil. Soyadları Cəfərovdur, yalandan yazırlar. Kiminsə soyadı Cəfərovdur deyə, o mənim qohumum olmalıdır? Heç oradakı adamlarla əlaqəmiz yoxdur. Təsadüfi adamlardır, laborantdır, müəllimdir, heç tanımıram. Onlar arasında 4 nəfər bizim adam var, onlar da mənim qardaşlarımdır. Tanınmış adamlardır və 65 nəfər arasında namizədliklərini irəli sürüblər. Onların da seçilib-seçilməyəcəyi hələ sual altındadır. Kimə etimad göstərilir, kimə göstərilmir, bunu seçkilər göstərəcək. Kimsə mərdimazarlıq edir, kimsə qanunları bilmədən yazır, kimsə siyahıdakı adamları tanımadan yazır... Burada qeyri-qanuni və qəbahətli heç bir şey yoxdur".ə

Bəs qanunla bir ailədən bir neçə nəfərin bələdiyyə seçkilərinə qatılması mümkündürmü?

Mövzu il bağlı hüquqşünas Əsabəli Mustafayev “Yeni Müsavat”a danışıb: "Qanunda belə bir qadağa yoxdur ki, bir ailədə yalnız bir nəfər namizədliyini irəli sürə bilər. Bu seçkidir və hər kəs öz namizədliyini verə bilər, yəni heç bir problem yoxdur. Beləliklə, bir ailədən 8 nəfərin 8-i də namizəd ola bilər. Seçkininin müqəddəratını seçicilər həll edir. Əgər seçicilər düşünsələr ki, həmin 8 nəfər bir ailə üzvü olsa da vicdanlıdır, bələdiyyə üzvü olmağa layiqdir, bu zaman seçki hüququ onlarda olacaq.

Belə olan halda ailə üzvləri arasında ciddi rəqabət, çəkişmə yaranacaq, yarışacaqlar. Burada yalnız ailənin içərisində problem yarana bilər, nəinki digər namizədlərlə".

Xatırladaq ki, Azərbaycanda bələdiyyə seçkiləri dekabrın 23-də keçiriləcək. Respublika üzrə 1606 bələdiyyəyə 15 min 156 üzv seçiləcək.

Manevr.az