_99.jpg)
Xəbər lenti
Namiq Hacıheydərli: "İlahi, mən sənə necə üz tutum?"
İlahi!
Mən sənə necə səslənim?
Necə səslənim ki, duyasan məni?
Manevr.az şair Namiq Hacıheydərlinin yeni şeirlərini təqdim edir:
ULUSA SƏSLƏNİŞ
Min illər Tanrının sevimli dostu,
Min il ulusların lələsi oldun.
Tanrı üz çevirdi səndən, o çağ ki;
Bədəvi toplumun köləsi oldun.
Faciən başladı; din dəyişən gün;
Şamanı küsdürdün, Xanı unutdun.
Uzaq yad torpaqda taxtu-tac üçün,
Vuruşan yadlara matəmi tutdun.
Gerçək ağsaqqalın Qorquda obraz,
Ən böyük yalana xilaskar dedin.
Səni yatıranı müqəddəs bilib,
Səni oyadana kor və kar dedin...
Qoşuldun min yerə bölünmüşlərə,
Sevgidən soyundun, nifrət aradın.
Müqəddəs elinə arxa çevirib,
Gedib cəhənnəmdə cənnət aradın
Yaddaş itirməyin, unutqanlığın,
Didir ürəyimi, ruhumu əzir.
Sən yanlış yerlərdə Tanrını gəzirsən,
Şeytan yuvasında Tanrı nə gəzir...
BOZQURD KÖHNƏLİK OLDU
Qılınclar qında pas atdı,
Gülüşlər dodaqda qaldı.
Atlar bozqırda yox oldu,
Kımızlar ocaqda qaldı.
Ağac bir kərə bəzəndi,
İldə bir yol don geyindi.
İnsan qopdu təbiətdən,
Ruh soyundu, qan geyindi.
Göy Tanrı dostumuz idi,
Hərdən Ondan küsürdük,
Tərcüməsiz danışırdıq,
Nə qorxurduq, nə əsirdik...
Hər birimiz Beyrək idik,
Xal düşməzdi şanımıza,
Qılınc girər, fəqət yadlar,
Girəmməzdi yanımıza.
Yoxa çıxdı qutsallıqlar,
Analıqlar dəlik oldu.
İndi köpəklik dəbdədi,
Bozqurd köhnəlik oldu.
UTANDIM...
Önümə baxdım;
Torpağı parça-parça,
Yurdumu viran gördüm.
Geriyə baxdım;
Nalə səsləri gəldi,
Hər yanı al qan gördüm.
Sağıma baxdım;
əlillər,
Soluma baxdım
Zəlillər...
Utandım;
Utandım Tanrıdan xoşbəxtlik diləməyə...
AYIN NEÇƏSİNDƏ SƏNİ ÇAĞIRIM?
İlahi, mən sənə necə üz tutum?
Hayanda dayanım,
Hardan səslənim?
Yerim səhra olsun, yoxsa meşələr,
Dərədə dayanım, zirvədə durum?
Gecəmi, gündüzmü əl açım sənə,
Məğrurmu dayanım, boynumu burum?
İlin hansı fəsli, fəslin nə ayı,
Ayın neçəsində səni çağırım?
Üfüqə göz dikim, göyə boylanım
Söylə, pıçıldayım, yoxsa bağırım?
Yazılı soruşum, şifahi deyim,
Zildənmi hayqırım, pəsdənmi dinim?
İlahi!
Mən sənə necə səslənim?
Necə səslənim ki, duyasan məni?
GÜLÜŞLƏR
Bütün gülüşlər bədbəxtlikləri gizlətmək üçündü,
Dünyanın ən bədbəxt adamıdı;
Dünyanın ən çox gülən adamı...
Namiq Hacıheydərli
Manevr.az
Xəbəri paylaş
Çox oxunanlar
Son yüklənənlər
Axtarış
Reklam
İqtisadiyyat
Ədəbiyyat
Yazarlar
KƏRAMƏT
Emil Rasimoğlu
KƏRAMƏT
Aydın Canıyev
Aydan Ay
Emil Rasimoğlu
Sorğu
Portalımızı dəyərləndirin.
Çox oxunanlar