Əlahəzrət prezident şeyx professor əl-hacı Yahya Camma...

Diktatorun yerinə Adam gəlir...

Dünyanın diqqəti planetin ən güclü dövləti ABŞ-da yeni seçilmiş prezident Donald Trampın andiçmə mərasiminə yönəldiyi bir vaxtda Afrikanın ən kiçik dövləti Qambiyada böyük maraq doğuran hadisələr baş verir. Ötən ilin dekabrın əvvəllərində Qambiyada prezident seçkiləri keçirilib və prezident Yayya Camma seçkiləri uduzub. Artıq keçmiş prezident sayılan Y.Camma televiziyada çıxış edib seçkilərin ciddi pozuntularla keçdiyini və nəticələrini tanımadığını bildirib. Üç tərəfdən Seneqal dövlətilə əhatə olunmuş Qambiyaya Seneqalın qoşunları yeridilib və Cammaya başa salmaq istəyirlər ki, da çıx get, qalib müxalifətin namizədi Adam Berroudur. Hələ danışıqlar gedir və Qvineya dövləti Cammaya sığınacaq verməyə hazır olduğunu bildirib və diktatoru başa salmağa çalışırlar ki, gərginlik yaratma, xoşluqla get.

Ölkəni milyard il idarə edəcəyini deyən diktator gedir

Kimdi bu Yahya Camma? 1996-cı ildə 29 yaşında baş leytenant Yahya hərbi çevriliş nəticəsində hakimiyyətə gəlib və klassik Afrika diktatorlarının bütün atributlarını özündə cəmləyib. Diktatorun sevimli əyləncələrindən biri ölkədəki cadugərlərin, falçıların sözün həqiqi mənasında “ovunu” etməkdir və hakimiyyəti illərində mindən çox cadugər onun qurbanı olub. Bir sıra hallarda cadugərlərdən laboratoriya heyvanları kimi üzərilərində eksperment aparıb. Bütün KİV nümayəndələrini, hətta tibb işçilərini də təqibə məruz qoyub. Ölkə əhalisinə SPİD-in dərmanını özü tapması haqqında məlumat verib və yeni dərmana “prezident mazı” adı qoyaraq reseptini gizli şəkildə ölkədən çıxardığını bəyan edib.

Ölkəni milyard il idarə edəcəyini deyən diktator gedir

Hakimiyyətdə 10 ildən çox qalandan sonra əhaliyə bildirib ki, o kral olmaq istəyir və Allah ona ölməzlik verib, ölkəni milyard il idarə edəcək. Cammanın rəsmi titulu belədir: “Əlahəzrət prezident şeyx professor əl-hacı Yahya Camma”

Seçkilərə altı ay qalmış bütün müxalifət liderlərini həbsə göndərib , beynəlxalq müşahidəçilərdən imtina edib. Seçkiyə bir gün qalmış bütün internet və beynəlxalq telefon rabitəsini kəsib və arxayın oturub ki, hamı ona səs verəcək. Amma, inanımaz hadisə baş verib. London mağazasının birində qarovulçu işləyən, birləşmiş müxalifətin nümayəndəsi Adam Berrou seçkilərdə qalib gəlib. Ölkədə tanınmayan Adam Berrounun heç bir siyasi təcrübəsi yoxdur. Birləşmiş müxalifət hər ehtimala qarşı bir nəfəri-Adamı namizəd kimi qeydə aldıra bilib və Adam nəticədə qalib gəlib. Adamın qalib gəlməsinin yeganə səbəbi odur ki, ”Camma hamının canını boğazına yığıb. Hamını bezdirib”

Yeni seçilmiş prezident Adam Barrou qalib gəldiyini bilən kimi Seneqala qaçıb. Cammanın məmurları belə Barrounu ziyarətə gedib. Xarici ölkələrdəki səfirlər Adamı təbrik ediblər. Cammanın etibar etdiyi polis və ordu da işə qarışmayacağını bildirib.

Qambiya diktatordan canını qurtardı, Adamı hakimiyyətə gətirdi.

İlham İsmayıl (moderator.az)